வாரத்தில் 5 நாள் வேலை முறையை அமல்படுத்த கோரி வங்கி ஊழியர்கள் நாளை (செவ்வாய்க்கிழமை) நாடு தழுவிய அளவில் வேலை நிறுத்தத்தில் ஈடுபடுகின்றனர். இதனால் பண பரிவர்த்தனை சேவை பாதிக்கும் அபாயம் ஏற்பட்டுள்ளது.
வங்கித் துறையில் 5 நாள் வார வேலை முறையை அமல்படுத்த அரசு ஒப்புதல் வழங்க கோரி, நாளை (செவ்வாய்க்கிழமை) அகில இந்திய வங்கி வேலைநிறுத்தத்தை ஐக்கிய வங்கி தொழிற்சங்கங்கள் மன்றம் அறிவித்துள்ளது. இந்த வேலைநிறுத்தத்தில் இந்தியா முழுவதும் உள்ள பொதுத்துறை, தனியார், வெளிநாட்டு, பிராந்திய கிராமப்புற மற்றும் கூட்டுறவு வங்கிகளைச் சேர்ந்த சுமார் 8 லட்சம் ஊழியர்கள் மற்றும் அதிகாரிகள் பங்கேற்கின்றனர்.
தற்போது, வங்கி ஊழியர்களுக்கு ஞாயிற்றுக்கிழமைகளைத் தவிர, ஒவ்வொரு மாதமும் 2-வது மற்றும் 4-வது சனிக்கிழமைகள் விடுமுறை அளிக்கப்படுகின்றன. மீதமுள்ள சனிக்கிழமைகளிலும் விடுமுறை அளிக்க வேண்டும் என்ற வங்கி ஊழியர்களின் கோரிக்கை மறுபரிசீலனையில் இருந்து வருகிறது.
வார நாட்களில் வேலை நேரத்தை நீட்டித்து அனைத்து சனிக்கிழமைகளையும் விடுமுறை நாட்களாக அனுமதிக்க இந்திய வங்கிகள் சங்கமும் ஒப்புக்கொண்டன. ஆனால் அரசு முறையாக ஒப்புதல் அளிக்கவில்லை என்று கூறப்படுகிறது. இதனால் நாளை நாடு தழுவிய அளவில் வேலை நிறுத்தத்தை வங்கி ஊழியர்கள் சங்கம் அறிவித்துள்ளது.
டிஜிட்டல் வங்கி பரவலாகக் கிடைப்பதால், வேலைநிறுத்தம் தவிர்க்க முடியாதது என்றும், போராட்டத்தின் போது பொதுமக்கள் ஒத்துழைக்க வேண்டும் என்றும் வங்கி ஊழியர்கள் சங்க நிர்வாகிகள் கூறினர். இதனால் இன்று (குடியரசு தினம்) விடுமுறை மற்றும் 27-ந் தேதி (நாளை) வேலை நிறுத்தம் என 2 நாட்கள் பண பரிவர்த்தனை சேவை பாதிக்கும் அபாயம் ஏற்பட்டுள்ளது
