தூத்துக்குடியில் அகில இந்திய கைப்பந்து போட்டி: வ.உ.சி துறைமுக துணைத் தலைவர் தொடங்கி வைத்தார்!

இப்போட்டியின் தொடக்க விழாவிற்குத் வ.உ.சிதம்பரனார் துறைமுக ஆணையத் துணைத் தலைவர் ராஜேஷ் சௌந்தரராஜன் தலைமை தாங்கி போட்டிகளைத் தொடங்கி வைத்தார். மாவட்ட கைப்பந்து கழகத் தலைவர் ஜான் வசீகரன் அனைவரையும் வரவேற்றுப் பேசினார். தமிழ்நாடு மெர்கன்டைல் வங்கியின் துணைத் தலைவர் கௌதம், கால்டுவெல் மேல்நிலைப்பள்ளி தாளாளர் ரவி ராஜ், சத்யா ஏஜென்சி பொது மேலாளர் வில்சன் ஆகியோர் வாழ்த்துரை வழங்கினர். நிறைவாக, மாவட்ட கைப்பந்து கழகச் செயலாளர் ரமேஷ் நன்றி கூறினார்.

பெண்கள் பிரிவு: முதலாவதாக நடைபெற்ற பெண்களுக்கான ஆட்டத்தில் கல்கத்தா கிழக்கு ரயில்வே அணியும், எம்.ஜி. பல்கலைக்கழக (MGU) அணியும் மோதின. இப்போட்டியின் ஆரம்பம் முதலே அதிரடியாக விளையாடித் தங்கள் ஆதிக்கத்தைச் செலுத்திய எம்.ஜி. பல்கலைக்கழக அணியினர் 25-23, 25-20, 25-10 என்ற நேர் செட்களில் கணக்கில் கல்கத்தா அணியை வீழ்த்தி அபார வெற்றி பெற்றனர்.

ஆண்கள் பிரிவு: இரண்டாவதாக நடைபெற்ற ஆண்களுக்கான ஆட்டத்தில் டெல்லி இந்தியன் நேவி அணியும், சென்னை எஸ்.ஆர்.எம். பல்கலைக்கழக (SRM) அணியும் களம் கண்டன. விறுவிறுப்பாக நடைபெற்ற இப்போட்டியில் சென்னை எஸ்.ஆர்.எம். பல்கலைக்கழக அணியினர் 25-22, 25-23, 25-15 என்ற புள்ளி கணக்கில் இந்தியன் நேவி அணியை வீழ்த்தி வெற்றி பெற்றனர்.

வருகிற 14-ஆம் தேதி வரை மொத்தம் 6 நாட்கள் நடைபெற உள்ள இப்போட்டிகளில், அகில இந்திய அளவில் தகுதி பெற்ற தலைசிறந்த பல ஆண்கள் மற்றும் பெண்கள் அணிகள் கலந்துகொண்டு விளையாடி வருகின்றன.