தாமிரபரணி ஆற்றங்கரையில் பிறந்து தமிழ்த்தொண்டு ஆற்றியவர்கள் பலர். வைணவ இலக்கியங்களில் மிகவும் பழமையானதும் முதன்மையானதுமாகக் கருதப்படுவது ‘நாலாயிர திவ்விய பிரபந்தம்’ ஆகும். இதில் உள்ள 4,000 பாடல்களில், சுமார் 1,000 பாடல்கள் திருநெல்வேலிச் சீமையைச் சேர்ந்த நம்மாழ்வாரால் பாடப்பட்டவை. பன்னிரு ஆழ்வார்களில் நம்மாழ்வார் மிக முக்கியமானவர்.
விசிஷ்டாத்வைதம் என்ற வைணவப் பிரிவை உலகறியச் செய்த இராமானுஜர், நம்மாழ்வாரைத் தன் மானசீக குருவாகவும், ‘தமக்கே தலைவர்’ என்றும் போற்றினார். நம்மாழ்வாரின் காலம் கி.பி. 8 அல்லது 9-ஆம் நூற்றாண்டு என்று வரலாற்று ஆய்வாளர்களால் கருதப்படுகிறது. இராமானுஜர் கி.பி. 11-12 ஆம் நூற்றாண்டில் வாழ்ந்தவர். நம்மாழ்வார் அவருக்கு முன்னரே வாழ்ந்தவர் என்பது குறிப்பிடத்தக்கது.
நெல்லைச் சீமையில் உள்ள ‘ஆழ்வார்திருநகரி’ இவரது பெயராலேயே அழைக்கப்படுகிறது. இதனை ‘ஆழ்வார் திருநெல்வேலி’ என்றும் கூறுவர். சைவத் திருநெல்வேலிக்கு இணையாக இந்த வைணவத் திருநெல்வேலி போற்றப்படுகிறது. நம்மாழ்வாரின் இயற்பெயர் ‘சடகோபன்’. இவரது தந்தை பெயர் ‘பொற்காரி’, தாய் ‘உடைய நங்கை’. இவர் பாண்டிய மன்னர் மரபில் வந்தவர் என்பதால் ‘மாறன்’ என்றும் அழைக்கப்படுகிறார்.
வில்லிப்புத்தூரார்: வியாசர் எழுதிய மகாபாரதம் உலக மகா காவியங்களில் தலைசிறந்தது. பல்லாயிரம் பாடல்களைக் கொண்ட அந்த மாபெரும் காவியத்தை எளிய தமிழில் ‘வில்லி பாரதம்’ எனத் தந்தவர் வில்லிப்புத்தூரார். காவிய அழகில் வில்லி பாரதமானது கம்பராமாயணம் மற்றும் சீவக சிந்தாமணியோடு ஒப்பிடத்தக்கது.
இன்று விருதுநகர் மாவட்டமாக இருந்தாலும், அன்றைய நெல்லைச் சீமையின் ஒரு பகுதியாகவே ஸ்ரீவில்லிப்புத்தூர் இருந்தது. இங்குப் பிறந்த இவரை ஊரின் பெயராலேயே ‘வில்லிப்புத்தூரார்’ என்று அழைக்கிறோம். வில்லிப்புத்தூர் (வில்லுக்காரர்களின் புதிய ஊர்) என்ற பெயருடன் ‘திரு’ (ஸ்ரீ) என்ற அடைமொழி சேர்ந்து ‘ஸ்ரீவில்லிப்புத்தூர்’ ஆனது. இவரது காலம் கி.பி. 14-ஆம் நூற்றாண்டு எனப் பொதுவாகக் கருதப்படுகிறது. இங்குள்ள வைணவக் கோயிலும், ஆண்டாளும் உலகப் புகழ்பெற்றவை. ஆழ்வார்திருநகரிக்கு இணையாக வைணவப் பெருமக்களால் இவ்வூர் போற்றப்படுகிறது. பிரிட்டிஷ் ஆவணங்களில் இவ்வூர் ‘நாச்சியார்கோயில்’ என்று குறிப்பிடப்பட்டுள்ளது.
பரிமேலழகர்: தமிழின் உலகச் சிறப்புகளில் முதன்மையானது திருக்குறள். ஏழே சொற்களில் உலகமே ஏற்கும் வாழ்வியல் உண்மைகளை 2,000 ஆண்டுகளுக்கு முன்பே கூறியவர் திருவள்ளுவர். இன்றும் பொருந்தக்கூடிய கருத்துகளைக் கொண்டிருப்பதால் இது ‘உலகப் பொதுமறை’ எனப்படுகிறது. திருக்குறளுக்குப் பலர் உரை எழுதினாலும், ‘பரிமேலழகர் உரை’யே மிகச்சிறந்த உரையாகக் கருதப்படுகிறது. இலக்கியங்களில் திருக்குறள் எப்படியோ, உரைகளில் பரிமேலழகர் உரை அப்படிச் சிறப்பானது. இவர் தூத்துக்குடி மாவட்டத்தைச் சேர்ந்த கரிசல் பகுதியில் வாழ்ந்ததாகவும், இவரது கல்லறை ‘கீழ ஈரால்’ அருகில் இருப்பதாகவும் ஒரு கருத்து நிலவுகிறது.
குமரகுருபரர்: பக்தி இலக்கியத்தைப் பொறுத்தவரை நெல்லைச் சீமையில் அண்மைக் காலத்தில் (17-ஆம் நூற்றாண்டு) தோன்றிய சிறந்த நீதிநூல் ‘நீதிநெறி விளக்கம்’. திருக்குறள், நாலடியார் போன்றே இதுவும் உயர்ந்த கருத்துகளைக் கொண்டது. இதனை இயற்றியவர் ஸ்ரீவைகுண்டத்தில் பிறந்த குமரகுருபரர் ஆவார். இவர் 1623 முதல் 1659 வரை வாழ்ந்தவர். ‘தம்புரான்’ என்பது துறவிகளைக் குறிக்கும் கௌரவப் பெயராக இவருக்கு வழங்கப்பட்டது. ஸ்ரீவைகுண்டம் ஒரு புகழ்பெற்ற வைணவத் தலம் என்றாலும், அங்குப் பிறந்து சைவத் தொண்டாற்றியவர் குமரகுருபரர் என்பது குறிப்பிடத்தக்கது.
மேலும் பல தகவல்கள் ஸ்ரீவைகுண்டத்தைப் பற்றி உள்ளன.
(நதி வற்றாமல் ஓடும்…)
