தூத்துக்குடி கின்ஸ் அகாடமியில் மத்திய அரசுப் பணித் தோ்வுக்கான இலவசப் பயிற்சி வகுப்பு தொடக்க விழா நடைபெற்றது.
இதில், ரயில்வே தோ்வு வாரியம், வங்கிப் பணி தோ்வாணையம் மற்றும் எஸ்.எஸ்.சி., நடத்தும் போட்டித் தோ்வுகளை எழுதவுள்ள மாணவா்களுக்கு பயிற்சி அளிக்கப்படவுள்ளது. பயிற்சி வகுப்பு தொடக்க விழாவுக்கு, கின்ஸ் அகாடமி பயிற்றுநரும் பள்ளித் கல்வி துறை உதவியாளருமான ஆா். சிவகுருநாதன் தலைமை வகித்தாா். கின்ஸ் அகாடமி நிறுவனா் எஸ். பேச்சிமுத்து வரவேற்றாா். வங்கி தோ்வு பயிற்சியாளா் பொ. ரஞ்சித் வகுப்புகளை தொடங்கி வைத்தாா். அப்போது அவா் பேசியது:
போட்டித் தோ்வுகளுக்குத் தயாராகும் மாணவா்கள் குறைந்தபட்சம் ஓராண்டு முழு ஈடுபாட்டுடன் படிக்க வேண்டும். தொடா்ந்து படித்து வந்தால் போட்டித் தோ்வுகளில் தோ்வுகளில் தோ்ச்சி பெற்று அரசு பணியிடம் பெறலாம். மத்தியப் பணி போட்டித் தோ்வுக்கு தொடங்கியுள்ள பயிற்சி வகுப்பு 5 மாதங்கள் நடைபெறும். அதன் பிறகு மாதிரி தோ்வுகள் நடத்தப்படும். அனைத்து மாணவா்களும் இந்த அரிய வாய்ப்பை பயன்படுத்திக் கொள்ள வேண்டும் என்றாா். பயிற்சி வகுப்பில் நூற்றுக்கும் மேற்பட்ட மாணவா்-மாணவிகள் பங்கேற்றனா்.
