சூப்பர் ஸ்பெஷாலிட்டி மருத்துவமனை: தமிழக அரசின் அரசாணையை ரத்து செய்ய கோரிக்கை!

இதுதொடர்பாக, பாஜக தூத்துக்குடி தெற்கு மாவட்ட தலைவர் ஆர். சித்ராங்கதன், மத்திய அமைச்சருக்கு அனுப்பியுள்ள கடிதத்தில் கூறியிருப்பதாவது: 2021–2022 நிதியாண்டில், சிறுபான்மை மக்கள் அதிகம் வசிக்கும் பகுதிகளில் சுகாதார வசதிகளை மேம்படுத்தும் நோக்கில், PMJVK திட்டத்தின் கீழ் தூத்துக்குடி அரசு மருத்துவக் கல்லூரி வளாகத்தில், ஏழு மாடிகள் மற்றும் 687 படுக்கைகள் கொண்ட, மிக உயர்தர சூப்பர் ஸ்பெஷாலிட்டி மருத்துவமனை கட்டப்பட்டது.

ஆனால், இந்த மருத்துவமனையை பொதுமக்கள் பயன்பாட்டிற்கு திறப்பதற்குப் பதிலாக, கடந்த 23.10.2025 அன்று தமிழக அரசு வெளியிட்ட அரசாணை (G.O. MS. No.452) மூலம், அந்த மருத்துவமனை “மகப்பேறு மற்றும் குழந்தை நல மருத்துவமனையாக” மாற்றப்படும் என அறிவிக்கப்பட்டுள்ளது. இது PMJVK திட்டத்தின் அடிப்படை நோக்கத்திற்கு முற்றிலும் எதிரானதாகும்.

சூப்பர் ஸ்பெஷாலிட்டி மருத்துவ சேவைக்காக கட்டப்பட்ட மருத்துவமனையை, ஒரே துறைக்கான மருத்துவமனையாக மாற்றுவதால், தூத்துக்குடி மாவட்ட மக்கள், உயர் தொழில்நுட்பம் கொண்ட பல்துறை சிறப்பு மருத்துவ சேவைகளை இழக்கும் நிலை உருவாகும் எனவும் அவர் குறிப்பிட்டுள்ளார்.

எனவே, தமிழக அரசின் மேற்கண்ட அரசாணையை உடனடியாக ரத்து செய்து, அந்த மருத்துவமனை தனது முதன்மை நோக்கமான சூப்பர் ஸ்பெஷாலிட்டி மருத்துவமனையாக திறக்கப்பட்டு செயல்படுவதற்கு மத்திய அரசு உரிய நடவடிக்கை எடுக்க வேண்டும் என அவர் வலியுறுத்தியுள்ளார்.

மேலும், இந்த விவகாரத்தில் தலையிட்டு, தூத்துக்குடி மாவட்ட மக்களின் நலனை பாதுகாக்க வேண்டும் என்றும், பிரதமர் அவர்களின் கவனத்திற்கும் இக்கோரிக்கை கொண்டு செல்லப்பட்டுள்ளதாக அவர் தெரிவித்துள்ளார்.