சமூக தணிக்கை சிறப்பு கிராம சபை கூட்டம்: 13 தீர்மானங்கள் நிறைவேற்றம்

தூத்துக்குடி மாவட்டம், ஓட்டப்பிடாரம் அருகே உள்ள ஆரைக்குளம் கிராம ஊராட்சியில் மகாத்மா காந்தி தேசிய ஊரக வேலை உறுதித் திட்டம், பிரதம மந்திரி குடியிருப்பு திட்டம் தொடர்பான சமூகத்தணிக்கை சிறப்பு கிராம சபை கூட்டம் நடந்தது. தமிழ்நாடு சமூக தணிக்கை சங்கத்தின் சார்பில் தமிழகம் முழுவதும் உள்ள ஊராட்சிகளில் 23 கட்டங்களாக சமூக தணிக்கை நடைபெற்று வருகிறது.

இதில் 11-வது கட்டமாக தூத்துக்குடி மாவட்டத்தில் உள்ள 12 ஊராட்சி ஒன்றியத்தில் 20 கிராம ஊராட்சிகளில் நவ-25ம் தேதி முதல் நவ – 29ம் தேதி வரை மகாத்மா காந்தி தேசிய ஊரக வேலை உறுதி திட்டம், பிரதம மந்திரி குடியிருப்பு திட்டம் கிராம வள பயிற்றுநர்களால் சமூகத் தணிக்கை மேற்கொள்ளப்பட்டு அதற்கான சமூகத் தணிக்கை அறிக்கை சிறப்பு கிராம சபை கூட்டத்தில் ஒப்புதல் பெறப்பட்டது.

ஆரைக்குளம் கிராம ஊராட்சியில் நடந்த கிராம சபை கூட்டத்திற்கு கூட்டத் தலைவர் காளியம்மாள் தலைமை வகித்தார். ஊராட்சி மன்ற தலைவர் சங்கரி, மண்டல துணை வட்டார வளர்ச்சி அலுவலர் இமாம் அசேன் ஆகியோர் முன்னிலை வகித்தனர். ஊராட்சி செயலர் மாலதி அனைவரையும் வரவேற்றார்.

கூட்டத்தினை ஓட்டப்பிடாரம் சமூகத் தணிக்கை வட்டார வள பயிற்றுனர் முத்துமுருகன் வழிநடத்தி சமூக தணிக்கை அறிக்கை தொடர்பாக மக்களுடன் கலந்துரையாடல் செய்தார். கூட்டத்தில் வேலை அட்டை வேண்டி விண்ணப்பித்த பயனாளிக்கு வேலை அட்டை வழங்கப்பட்டது.

சமூகத் தணிக்கை அறிக்கை குறித்த 13 தீர்மானங்கள் நிறைவேற்றப்பட்டன. இதில் கிராம வள பயிற்றுநர்கள் ராஜகுமாரி, மாரியம்மாள், கலைமணி, முத்துசெல்வி, வார்டு உறுப்பினர்கள், பணித்தள பொறுப்பாளர்கள் உள்பட பொதுமக்கள் பலர் கலந்து கொண்டனர். முடிவில் பணித்தள பொருப்பாளர் ராமலட்சுமி நன்றி கூறினார். இதேபோல் ஓட்டப்பிடாரம் ஊராட்சி ஒன்றியத்தில் மீனாட்சிபுரம், தென்னம்பட்டி உள்பட தூத்துக்குடி மாவட்டத்தில் 20 ஊராட்சிகளில் சமூக தணிக்கை சிறப்பு கிராம சபை கூட்டம் நடந்தது.