தூத்துக்குடி விமான நிலையத்தில் விமான நிலைய சுற்றுச்சூழல் மேலாண்மைக் குழு மற்றும் ஏரோட்ரோம் குழுவின் ஆலோசனைக் கூட்டம் இன்று நடைபெற்றது. கூட்டத்திற்கு, கலெக்டர் செந்தில்ராஜ் தலைமை வகித்தார்.
கூட்டத்தில், விமான நிலைய ஓடுதளத்தை சுற்றியுள்ள பகுதிகளில் பறவைகள் மற்றும் வனவிலங்குகள் வராமல் தடுப்பது மற்றும் இதற்காக நடத்தப்பட்ட கூட்டுப் பறவைப் பகுதி கணக்கெடுப்பு குறித்தும், விமான நிலையத்தில் இருந்து கழிவு, குப்பைகளை அகற்றுவதற்கான செயல் திட்டம் குறித்தும், வல்லநாடு மலையில் விளக்குகள் அமைப்பது, விரிவாக்க நடவடிக்கைகளை கருத்தில்கொண்டு விமான நிலையத்தை சுற்றியுள்ள தடைகளை நீக்குவது குறித்தும் விவாதிக்கப்பட்டது.
அதில், விமான நிலையத்தை சுற்றியுள்ள பகுதிகளில் மழைக்காலங்களில் வெள்ளம் ஏற்படுவதை தவிர்க்க இயற்கை ஆதாரங்கள் மற்றும் செயல்திட்டத்தை கண்டறியவும் அறிவுறுத்தப்பட்டது.
அதுபோல், சிவத்தையாபுரத்தில் விமான நிலைய ஓடுபாதை 28ன் அணுகுமுறை பாதையில் திறந்த நிலத்தில் கோழிக்கழிவுகளை கொட்டுவது கண்டறியப்பட்டுள்ளது. அங்கு இன்னும் விற்பனையாளர்கள் கோழிகளின் கழிவுகளை கொட்டுவதால், அந்த கழிவுகள் அப்பகுதி முழுவதும் கழுகுகள் மற்றும் பறவைகளை ஈர்க்கிறது.
இதனை தடுத்திட கூட்டாம்புளி கிராமத்தில் கால்நடைக் கழிவுகள் மேலாண்மை ஆலை அமைத்து, இதனை முறைப்படுத்த வேண்டும். இது குறித்து அனைத்து ஊராட்சிகளுக்கும் சுற்றறிக்கை அனுப்புமாறு சம்பந்தப்பட்ட அதிகாரிகளுக்கு கலெக்டர் செந்தில்ராஜ் அறிவுறுத்தினார்.
மேலும், விமானநிலையத்தை சுற்றியுள்ள பகுதிகளில் பறவைகளை கட்டுப்படுத்துவதற்கு விமான நிலையத்தின் மூலமாக பறவைகளை பயமுறுத்துவதற்காக பட்டாசுகளை வெடிப்பதற்காக பறவை பயமுறுத்தப்பட்டவர்கள் நியமிக்கப்பட்டும், மண்டல துப்பாக்கி வழங்கிடவும் தீர்மானிக்கப்பட்டுள்ளது.
விமான நிலையத்தை சுற்றியுள்ள பகுதிகளில் பறவைகளின் நடமாட்டத்தை ஆய்வு செய்வதற்கு ஒருவர் ஈடுபடுத்தப்படுவார் என்றும், அதன்படி நடவடிக்கை எடுக்கப்படும் என்றும் மாவட்ட வன அலுவலர் தெரிவித்தார்.
சூரியஒளி மின்சாரம் வழங்கவும், வல்லநாடு மலை விளக்குகளுக்கு டெண்டர் கோரப்பட்டு அதற்காக பணிகள் வரும் மார்ச் 31ம் தேதிக்குள் பணிகள் முடிக்கப்படும். இதன்மூலமாக இரவு தரையிறங்கும் நடவடிக்கைகள் எளிதாகும் என்று விமான நிலைய இயக்குநர் கூறினார்.
இதில், விமான நிலைய இயக்குநர் சுப்ரமணியன், கூடுதல் ஏ.எஸ்.பி., கோபி, மாவட்ட வன அலுவலர் அபிஷேக்தோமர் மற்றும் துறை சார்ந்த அதிகாரிகள் கலந்துகொண்டனர்.
