தாமிரபரணியைக் காப்பாற்றுவோம் – முத்தாலங்குறிச்சி காமராசு

திருநெல்வேலி ‘புதிய தலைமுறை’ மண்டல நிருபர் திரு. மருதுபாண்டியன் அவர்கள் தகவல் அறியும் உரிமைச் சட்டத்தின் கீழ் தகவல் கேட்டபோது, மாசுக் கட்டுப்பாட்டு வாரியம் அதிர்ச்சிகரமான தகவலைக் அளித்துள்ளது. குறிப்பாகத் தாமிரபரணி ஆற்றில் மலக்குடல் கோலிபார்ம் (Fecal Coliform) கிருமிகள் 8.6 மடங்கு அதிகரித்துள்ளன. அம்பாசமுத்திரத்தில் 13.7 ஆக இருந்த அளவு, திருநெல்வேலி ஆட்சியர் அலுவலகப் பாலம் அருகே 117.4 மி.லீ. ஆக உயர்ந்துள்ளது. ஆற்றில் ஆய்வு செய்யப்பட்ட 9 இடங்களில் 7 இடங்களில் மொத்த கோலிபார்ம் அளவு, ‘வகுப்பு ஏ’ குடிநீர் ஆதாரத்துக்கான 50 மி.லீ. வரம்பைத் தாண்டியுள்ளது. ராமையன்பட்டி கழிவுநீர் சுத்திகரிப்பு நிலையத்திலிருந்து வெளியேறும் நீரில் மலக்குடல் கோலிபார்ம் அளவு 836 மி.லீ. ஆக உயர்ந்துள்ளது; இதன் நிர்ணயிக்கப்பட்ட அளவு 230 ஆகும். மாநகராட்சியின் 14 பரவலாக்கப்பட்ட கழிவுநீர் சுத்திகரிப்பு மையங்களில் 2 மையங்களில் மட்டுமே ஆய்வு மேற்கொள்ளப்பட்டுள்ளது.