திருச்செந்தூர் நகராட்சி கழிப்பிடங்களில் மக்கள் பார்வைக்கு கட்டண விவரத்தை ஒட்ட வேண்டும் என நகராட்சி ஆணையாளர் ஈழவேந்தன் உத்தரவிட்டார்.
தூத்துக்குடி மாவட்டம், திருச்செந்தூர் நகராட்சியில் பகத்சிங் பேருந்து நிலையம், ஆவுடையார்குளம், எடிசன் மருத்துவமனை அருகில், வட்டாட்சியர் அலுவலகம் அருகில் உள்ளிட்ட 11 இடங்களில் நகராட்சி சார்பில் கட்டண குளியல் மற்றும் கழிப்பிடங்கள் உள்ளன. இவற்றை ஏலம் எடுத்து குத்தகைதாரர்கள் நடத்தி வருகின்றனர். இந்த கழிப்பிடங்களில் அரசு நிர்ணயிக்கப்பட்ட கட்டணத்தை விட கூடுதல் தொகை வசூலிப்பதாக புகார் எழுந்தது. சமூக வலைதளங்களிலும் வீடியோ காட்சி பரவியது.
இந்நிலையில், கட்டண கழிப்பிடங்களை ஆய்வு செய்த ஆணையாளர், கட்டண விவரத்தை மக்கள் பார்வையில் தெரியும்படி ஒட்ட வேண்டும் என உத்தரவிட்டார். கழிப்பிடத்துக்கு ரூ. 5, ரூ. 10, குளிப்பதற்கு ரூ. 10 என்ற விவரம் இடம்பெற வேண்டும். புகாருக்கு 9363779191 என்ற வாட்ஸ் ஆப் எண்ணில் தெரிவிக்கலாம் என நகராட்சி ஆணையாளர் தெரிவித்துள்ளார். ஆய்வின்போது, சுகாதார ஆய்வாளர் முத்துக்குமார் உள்ளிட்டோர் உடனிருந்தனர்.
