தூத்துக்குடியில் பசுமைப் பயண மிதிவண்டி பேரணி : ஆயர் ஸ்டீபன் தொடங்கி வைத்தார்

பேரணியில் தூத்துக்குடி தூய மரியன்னை கல்லூரி, அன்னம்மாள் கல்வியியல் கல்லூரி, புதுக்கிராமம் திருச்சிலுவை மனையியல் கல்லூரி, புனித தாமஸ் கல்வியியல் கல்லூரி மாணாக்கர் சுற்றுச் சூழல் விழிப்புணர்வுப் பதாகை ஏந்தி கலந்து கொண்டனர். தூத்துக்குடி சாலைகளின் இருபுறமும் நகரப் பள்ளி மாணவ – மாணவியர் பச்சை நிறக் கொடியை அசைத்து வரவேற்றனர்.

இந்நிகழ்வின் ஒரு பகுதியாகத் தூய மரியன்னை கல்லூரி மாணவிகள் காலைப் பொழுதில் முத்து நகர் கடற்கரையைத் தூய்மை செய்தனர். 1500 விதைப் பந்துகளும், 1000 மஞ்சள் பைகளும், 500 மரக்கன்றுகளும், 500 விதை பாக்கெட்டுகளும் மக்களுக்கு வழங்கப்பட்டன.

செயின்ட் தாமஸ் கல்வியியல் கல்லூரி மாணவிகள் சுற்றுச்சூழல் குறித்துப் பாடல்களைப் பாடினர். மிதிவண்டி பேரணி வீரர்களிடம் தூத்துக்குடியின் சுற்றுச் சூழலை மேம்படுத்த கோரிக்கை மனு கொடுக்கப்பட்டது. இம்மனு நிறைவு நாளில் சென்னையில் தமிழக முதல்வரிடம் வழங்கப்பட உள்ளது.

இந்நிகழ்வில் சுற்றுச்சூழல் ஆர்வலர்கள், இளையோர் இயக்கத்தினர், அமலோற்பவ மாதா மதுவிலக்கு சபையினர், வின்செந்தியன்கள், கிறிஸ்தவ வாழ்வுரிமை இயக்கத்தினர், அருள்பணியாளர்கள், அருள்சகோதரிகள், மறைமாவட்டப் பணிக்குழுக்கள், பேராசிரியர்கள், ஆசிரியர்கள், மீனவர்கள், வணிகப் பெருமக்கள், பல்வேறு பள்ளிகளின் நிர்வாகிகளென ஐநூறுக்கும் மேற்பட்டோர் கலந்து கொண்டனர். இன்றைய நாளில் பேரணி சென்ற பாதை எங்கும் பச்சை நிறக் கொடி பறந்தது.

முன்னதாக தூத்துக்குடி மாவட்ட துறவியர் பேரவைத் தலைவரும் புனித பிரான்சிஸ் சவேரியார் மேனிலைப் பள்ளியின் அதிபருமான அருள்திரு. மரிய சிங்கராயர் சே.ச. வரவேற்புரை வழங்கினார். துறவியர் பேரவையின் துணைத் தலைவரும் தூய மரியன்னை கல்லூரியின் முதல்வருமான அருள்சகோதரி ஜெஸ்ஸி நன்றியுரை கூறினார். நிகழ்வைத் தமிழ்ச் செம்மல் நெய்தல் அண்டோ தொகுத்து வழங்கினார். இந்நிகழ்ச்சிக்கான ஏற்பாட்டைத் தூத்துக்குடி மறைமாவட்ட துறவியர் பேரவையினர், தோழமை பள்ளிகள், கல்லூரிகள் மற்றும் சுற்றுச் சூழல் பாதுகாப்பு இயக்கத்தினர் இணைந்து செய்திருந்தனர்.