தூத்துக்குடி மாவட்டம் திருச்செந்தூர் அருகே உள்ள நாலுமூலைக்கிணறு கிராமத்தில் விடுதலைச் சிறுத்தைகளின் தேர்தல் அங்கீகார வெற்றி விழா பொதுக்கூட்டம் நடந்தது.
இதில் சிறப்பு விருந்தினராக விடுதலை சிறுத்தைகள் கட்சியின் துணைப் பொதுச்செயலாளர் வன்னி அரசு கலந்து கொண்டு சிறப்புரை ஆற்றினார்.
அப்போது அவர் பேசுகையில்,
2026 ல் தேர்தல் வரப்போகிறது. தேர்தல் வரப்போகிறது என்றால் என்ன பொருள். 2026 தேர்தலில் நடக்கின்ற தேர்தலில் ஆட்சியிலே அதிகாரத்திலேயே பங்கு பெறக்கூடிய இடத்திலே விடுதலை சிறுத்தைகள் வலிமை பெற வேண்டும். விடுதலை சிறுத்தைகள் ஆட்சி அதிகாரத்திற்கு வர வேண்டும்.
விடுதலை சிறுத்தைகள் ஆட்சியில் அமர வேண்டும். அண்ணன் திருமாவளவன் அவர்கள் முதல்வராக வரவேண்டும். இதுதான் நமது கனவு. தலைவர் ஒருநாள் நிச்சயம் முதல்வராக வருவார். அதில் எந்த மாற்றுக்கருத்தும் இல்லை. 1990 ஆம் ஆண்டு தலைவர் விசிக கொடியே ஏற்றும் போது இந்த கொடி விரைவில் கோட்டையில் பறக்கும் என்றார். இப்போது நாம் கோட்டைக்கு நமது கொடி கட்டி தான் செல்கிறோம். கோட்டைக்குள் கொடி கட்டிக் கொண்டு செல்லும் இயக்கமாக நமது இயக்கத்தை மாற்றியுள்ளார் நமது தலைவர்.
ஆட்சி அதிகாரத்திற்கு வர வேண்டும் என்பது தான் நமது கனவு என அம்பேத்கர் கூறியுள்ளார். அனைவரையும் இணைத்துச் செல்ல வேண்டும். சாதிக் கொடுமை என்ன என்பது நமக்கு மட்டும் தான் தெரியும். இன்று புதிதாக கட்சி ஆரம்பித்து வருகிறார்கள். அவர்களுக்கு எதுவுமே தெரியாது. ஸ்கிரிப்ட் எழுதி கொடுக்க வேண்டும். அதை மனப்பாடம் செய்து விட்டு என்ன புரோ என்று ஓட்டு கேட்பது போல் நின்று விட்டு சென்று விடுவார்கள். முழுக்க முழுக்க காலனிகள் சேரிகள் உள்ள மக்களை குறி வைத்து தான் அவர்கள் வேட்டையாட வருகிறார்கள்.
அதைத் தொடர்ந்து திருச்செந்தூர் அருகே தோப்பூரில் செயல்பட்டு வரும் பாதாள சாக்கடை திட்டத்தால் அந்த பகுதி மக்கள் அவதி அடைந்து வருவதை தொடர்ந்து அந்த பகுதி மக்கள் இது தொடர்பாக தொடர் போராட்டத்தில் ஈடுபட்டு வருகின்றனர்.
இந்த சம்பவம் அறிந்த வன்னி அரசு தோப்பூரில் செயல்பட்டு வரும் பாதாள சாக்கடை திட்ட பிளாண்டை நேரில் ஆய்வு செய்தார்.
