தூத்துக்குடி கோரம்பள்ளம் அருகே குடியிருப்பிற்குள் புகுந்த 4 அடி நீள சாரைப்பாம்பைத் தீயணைப்பு வீரர்கள் பாதுகாப்பாக மீட்டு வனப்பகுதியில் விட்டனர்.
தூத்துக்குடி மாவட்டம், கோரம்பள்ளம் சிவசக்தி நகரைச் சேர்ந்தவர் காஞ்சனாதேவி. இன்று இவரது வீட்டின் முன்பகுதிக்குச் சொகுசாக ஒரு பாம்பு நுழைவதைக் கண்ட குடும்பத்தினர் அதிர்ச்சியடைந்தனர். இது குறித்து உடனடியாக சிப்காட் தீயணைப்பு நிலையத்திற்குத் தகவல் தெரிவிக்கப்பட்டது. தகவல் அறிந்ததும், நிலைய அலுவலர் த. கார்த்திகேயன் தலைமையிலான வீரர்கள் சம்பவ இடத்திற்கு விரைந்து வந்தனர்.
வீட்டின் முன்புறம் இருந்த செடிகளுக்கு இடையே பதுங்கியிருந்த சுமார் 4 அடி நீளமுள்ள சாரைப்பாம்பை வீரர்கள் லாவகமாகப் பிடித்தனர். பிடிபட்ட சாரைப்பாம்பு பின்னர் ஆள் நடமாட்டம் இல்லாத பாதுகாப்பான வனப்பகுதியில் கொண்டு போய் விடப்பட்டது. குடியிருப்புப் பகுதிக்குள் பாம்பு புகுந்த இச்சம்பவம் அப்பகுதியில் சிறிது நேரம் பரபரப்பை ஏற்படுத்தியது. தீயணைப்பு வீரர்களின் இந்தத் துரித நடவடிக்கையைப் பொதுமக்கள் பாராட்டினர்.
