வரலாற்று எழுத்தாளர் முத்தாலங்குறிச்சி காமராசுவின் சிறப்புகள்.*
1. 144 வருடங்களுக்கு முன்பு இந்தியாவிலேயே முதன் முதல் அகழாய்வு நடந்த ஆதிச்சநல்லூரில் வெளிநாட்டவர்கள் சைட் அருங்காட்சியகம் இங்கு அமைக்க வேண்டும் என எழுதி வைத்துச் சென்றனர். ஆனால் பல்வேறு அகழாய்வு இங்கு நடந்தும் அருங்காட்சியம் அமைக்கும் பணி நடைபெறவில்லை. மேலும் 2004ம் ஆண்டு மத்திய தொல்லியல் துறை சார்பில் நடந்த அகழாய்வு பணியின் அறிக்கை 2017 வரை வெளிவரவில்லை. எனவே இதுகுறித்து மதுரை உயர்நீதிமன்றத்தில் வழக்கு தொடர்ந்து, ஆதிச்சநல்லூர் அறிக்கையையும், மீண்டும் இங்கு அகழாய்வு நடைபெறவும், ஆதிச்சநல்லூரில் உலகத்தரம் வாய்ந்த அருங்காட்சியம் அமைக்கவும் உத்தரவு பெற்றுத் தந்தவர். மேலும் சிவகளை, கொற்கை மற்றும் தாமிரபரணிக்கரையில் அகழாய்வு மேற்கொள்ள உயர்நீதிமன்றம் மூலம் அரசாணை பெற்றுத்தந்தவர். இந்த வழக்கு மூலம் கர்நாடகாவில் உள்ள 60 ஆயிரம் கல்வெட்டுகள் தமிழகத்திற்கு வர வேண்டும் என உத்தரவு பெற்று தந்தவர்.
2. கடந்த 23 வருடங்களாக தாமிரபரணியில் வைகாசி விசாகம் அன்று பிறந்த நாளை கொண்டாடி, தாமிரபரணியைக் காக்க உறுதி மொழியை தன் நண்பர்களுடன் எடுத்து வந்தார். தற்போது நெல்லை, தூத்துக்குடி மாவட்ட ஆட்சித் தலைவர்கள் தாமிரபரணியைச் சுத்தம் செய்யும் பணியைக் கடந்த 5 வருடங்களாக நடத்தி வருகிறார்கள். அதோடு மட்டுமல்லாமல் இவர் எழுதிய 57 நூல்களிலும் தாமிரபரணி புகழ் எழுதப்பட்டிருக்கும்.
3. ஒரு நதியைப்பற்றி அதிக நூல் எழுதியவர். தாமிரபரணியைத் தலைப்பாகக் கொண்டு தலைத்தாமிரபரணி, தாமிரபரணி கரையினிலே, தவழ்ந்து வரும் தாமிரபரணி, நவீன தாமிரபரணி மகாத்மியம், தரணி போற்றும் பரணி உள்படப் பல நூல்களை எழுதியுள்ளார்.
4. களரி என்பது தமிழர் கலை. தற்போது கேரளா அதை உரிமை கொண்டாடி வருகிறது. இதை மீட்டெடுத்து களரி தமிழர் கலைதான் என நிரூபிக்க உலக களரி அடிமுறை கூட்டமைப்பினருடன் இணைந்து நூல் எழுதி வருகிறார். இதில் இவர் மூன்று பாகம் எழுதி முடித்துள்ளார். இதில் முதல் பாகம் களரி அடிமுறை 1 என்ற பெயரில் முழு கலரில் புத்தகமாக வெளியாகி உள்ளது.
5. உலக நதிகள் வரலாற்றில் க்யூ.ஆர் கோடு வசதியுடன் 144 பகுதியையும் வீடியோ மூலம் பார்க்கும் வசதி கொண்ட நூலை நவீன தாமிரபரணி என்று உருவாக்கியவர்.
6. 20 ஜமீன்தார்கள் வரலாற்றைத் தொகுத்து தென்னாட்டு ஜமீன்தார்கள் என்ற 1000 பக்கம் நூலை எழுதியது. மேற்குத்தொடர்ச்சி மலையில் பொதிகை, அத்ரி, தோரணமலை, குற்றால மலைகள் குறித்து சித்தர்களின் சொர்க்கபுரி பொதிகை மலை, அத்ரிமலை யாத்திரை, தோரண மலை யாத்திரை என்று பல நூல்கள் எழுதியவர்.
7. தமிழ் வளர்க்க பாடுபட்ட சித்தர்கள் அறிஞர்கள் சமாதுகளைத் தேடி அதைப் தினசரி நாளிதழ்களில் தொடராய் எழுதி அருள்தரும் அதிசய சித்தர்கள் என்ற பெயரில் நூல் எழுதியவர்.
8. தற்போதும் எழுத்து பணியோடு, தாமிரபரணியைச் சுத்தப்படுத்தி மரங்கள் நடும் பணி, மறைந்து போன சுதந்திர போராட்ட தியாகிகள் வரலாற்றைத் திரட்டும் பணியில் ஈடுபட்டு வருகிறார்.
இவருக்குத் தமிழக அரசு தமிழ்ச்செம்மல் விருது (2020) வழங்கி கௌரவித்து உள்ளது.
9. தாமிரபரணி, மேற்கு தொடர்ச்சி மலைகள், ஜமீன்தார்கள் போன்ற வரலாற்று சிறப்பு மிக்க பகுதிகளுக்கு களப்பணியாக சென்று 58 புத்தகங்கள் எழுதியவர்.
10. 75 வருடம் சிறப்பு மிக்க சைவசிந்தாந்த நூல் பதிப்பு கழகம், விகடன் பிரசுரம், தினத்தந்தி பதிப்பகம், தி இந்து தமிழ் திசை பதிப்பகம், சூரியன் பதிப்பகம், காவ்யா பதிப்பகம்,தினமலரின் தாமரை பிரதர்ஸ் மீடியா, பொன்சொர்ணா போன்ற பிரபலமான பதிப்பகங்களில் நூல் எழுதியவர்.
11. ஆதிச்சநல்லூர், கொற்கை போன்ற வரலாற்று சிறப்பு மிக்க நகரங்களை ஆய்வு செய்து நூல் எழுதியவர். ஆதிச்சநல்லூரில் 2004 ல் நடந்த ஆய்வறிக்கையை சமர்பிக்காத மத்திய அரசை கண்டித்து மதுரை ஐகோர்டு மூலம் வழக்கு தொடர்ந்து வெற்றி கண்டவர்.
12. மேற்கு தொடர்ச்சி மலையில் பொதிகை மலை, தோரண மலை, அத்ரி மலை, குற்றால மலை குறித்து களப்பணி செய்து நூல் எழுதியவர்.தொடர்ந்து மகேந்திரகிரி மலை குறித்து ஆய்வு மேற்கொண்டு வருகிறார்.
13. பல ஊடகங்களில் 3,500 க்கு மேற்பட்ட படைப்புகளை தந்தவர்.
14. தாமிரபரணியை பற்றி மிகப்பெரிய எளிய நூலான 1000ம் பக்கம்கொண்ட தலைத் தாமிரபரணி நூலை எழுதியவர். தாமிரபரணியை மூன்றாக பிரிந்து தலைத்தாமிரபரணி , இடைத்தாமிரபரணி, கடைத்தாமிரபரணி என நூல் எழுத திட்டமிட்டு, தற்போது இடைத்தாமிரபரணி, கடைத்தாமிரபரணி நூலை எழுத பயணித்துக்கொண்டிருப்பவர்.
15. தென்பாண்டிச்சீமையிலே பாகம் -1, பாகம்-2 என இரண்டு நூல்களை தலா 1000ம் பக்கம் கொண்டது. இதில் முதல் நூல் காஞ்சிபுரம் உலக தமிழ் அரங்கத்தில் முதல் பரிசு பெற்றது. பாகம்-2 நெல்லை மாவட்ட ஆட்சி தலைவர் திரு.சமயமூர்த்தி அவர்களின் அணிந்துரையுடன் வெளியானது. இரண்டுமே ஒருங்கிணைந்த நெல்லை மாவட்டத்தினை பறைசாற்றும் விதமாக உருவான நூலாகும்.
16. இவரை பாளையங்கோட்டை சாராள் தக்கர் கல்லூரி மாணவி அந்தோணியம்மாள் ஆய்வு செய்து எம்.பில் பட்டம் பெற்றுள்ளார்.
17. இவரை ஆய்வு செய்து டாக்டர் பட்டம் பெற பாளையங்கோட்டையை சேர்ந்தவரும், எழுத்தாளரின் குருநாதர் அகஸ்தீஸ்வரன் என்பவரும், தெற்கு கள்ளிகுளம் தெட்சண மாற நாடார் கல்லூரி தமிழ் துறை (சுயநிதி) தலைவரான திசையன்விளை கிரிஜா என்பவரும் தனித்தனியாக பட்டம் பெற முயற்சித்து வருகிறார்கள்.
18. பஸ் நடத்துனராக வாழ்க்கையை தொடர்ந்து மேடை நாடக நடிகராய், நெல்லை வானொலி நாடக எழுத்தாளராய், நூல் ஆசிரியராக, சினிமா நடிகராக வலம் வந்து பல விருதுகளை பெற்றவர். சொந்தமாக தூத்துக்குடி மாவட்டம் செய்துங்கநல்லூரில் பொன்சொர்ணா ஸ்டுடியோ என்ற புகைப்பட நிறுவனத்தை நடத்தி வருவதோடு, பொன்சொர்ணா பதிப்பகத்தினை நடத்தி, தனது நூல்களை வெளியிட்டு வருகிறார். அதோடு மட்டுமல்லாமல் தனது மகன் அபிஷ் விக்னேஷ் மூலமாக மீடியா கிருக்கன் என்ற யூ டியூப் சேனலும், தனது சிஷ்யர் சுடலைமணி செல்வன் மூலமாக ஸ்ரீவைகுண்டம் டூடே நீயூஸ் என்ற யூ டியூப் சேனலும் நடத்தி வருகிறார். இவர் பெயரில் www.muthalankurichikamarasu.com என்ற வெப்சைட்டும் நடத்தி வருகிறார். இதில் இவரது நூலை தபாலிலும், இமெயில் மூலமும் பெற்றுக்கொள்ளலாம்.
19. 144 ஆண்டுகளுக்கு ஒருமுறை நடைபெறும் மகா புஷ்கர திருவிழாவை முன்னிட்டு தாமிரபரணி ஆற்றை சீரமைக்க வேண்டும் என்றும், சாக்கடைகள் கலக்காமல் தடுக்கவும் மதுரை உயர்நீதிமன்ற கிளையில் பொதுநல வழக்கு தொடர்ந்தவர். அதன் பயனாக வெற்றியும் கண்டவர். இந்த சமயத்தில் இவர் வெளியிட்ட நவீன தாமிரபரணி மகாத்மியம் என்னும்நூல் உலக நதிகள் வரலாற்றில் முதல் முதலாக பார்கோடு வசதியுடன் உருவாக்கப்பட்ட நூலாகும். இந்த நூல் ஆன்மிக அன்பர்களிடம் பெரும் வரவேற்பு ஏற்பட்டுள்ளது. தாமிரபரணி கரை கோயில்கள் பற்றி வெளி வந்த முழுமையான நூலாகும்.
20. பல்வேறு கட்டத்தில் கல்லூரிகள் நடத்தும் கருத்தரங்களில் இவர் கட்டுரையும், இவரைபற்றி மற்ற ஆய்வாளர்கள் எழுதும் கட்டுரையும் இடம்பெற்றுள்ளது. ச.வே.சு குறித்து நெல்லை மதிதா இந்து கல்லூரியில் தமிழ் துறை நடத்திய கருத்தரங்கு கட்டுரையும், பாளை சேவியர் கல்லூரி தமிழ்துறை நடந்திய தாமிரபரணி நதி சார்ந்த பண்ணாட்டு கருத்தரங்கத்தில் இவரை பற்றி இரண்டு கட்டுரையும் வாசிக்கப்பட்டுள்ளது.
21. நெல்லையில் இருந்து வெளிவரும் மாத இதழ் சான்றோர் மலரில் ஆசிரியர் குழுவில் இவர் பணியாற்றி வருகிறார். பிரபல பதிப்பகமான காவ்யா காலாண்டு இதழில் ஆசிரியர் குழுவில் இவர் பணியாற்றி வருகிறார். மும்பையில் இருந்து வெளிவரும் வார இதழ் வணக்கம் மும்பை இதழில் சிறப்பு செய்தியாளராக பணியாற்றி வருகிறார்.
22.இந்தியாவின் 75 வது சுதந்திர போராட்டத்தினை யட்டி தூத்துக்குடிமாவட்டத்தில் அறியப்படாத சுதந்திர பேராட்ட வீரர்கள் குறித்து இவர் எழுதிய நூலை தூத்துக்குடி மாவட்ட நிர்வாகம் சார்பில் மாவட்ட ஆட்சி தலைவர் மரு.கி.செந்தில் ராஜ் வெளியிட்டுள்ளார்.


