திருச்செந்தூர் கோயில் வைகாசி விசாகப் பெருவிழா : 4 நாட்களுக்கு 100 ரூபாய் கட்டணத் தரிசனம் ரத்து!

முருகப் பெருமானின் இரண்டாம் படை வீடான திருச்செந்தூர் சுப்பிரமணிய சுவாமி திருக்கோயிலில் வைகாசி விசாகத் திருவிழா கடந்த மே 24-ஆம் தேதி கொடியேற்றத்துடன் தொடங்கி விமரிசையாக நடைபெற்று வருகிறது. திருவிழாவின் பிரதான முக்கிய நிகழ்வான வைகாசி விசாகப் பெருந்திருவிழா வரும் மே 30-ஆம் தேதி (சனிக்கிழமை) வெகு விமரிசையாகக் கொண்டாடப்பட உள்ளது.

இதையொட்டி, தமிழகத்தின் பல்வேறு மாவட்டங்கள் மற்றும் அண்டை மாநிலங்களில் இருந்து லட்சக்கணக்கான ஆன்மீகப் பக்தர்கள் திருச்செந்தூர் கடற்கரை வளாகத்தில் திரளுவார்கள் என எதிர்பார்க்கப்படுகிறது. திருவிழா நாட்களில் பொதுமக்களும், பாதயாத்திரையாக வரும் எளிய பக்தர்களும் நீண்ட நேரம் வெயிலில் காத்திருப்பதைத் தவிர்க்கும் பொருட்டு, கோயில் நிர்வாகம் தரிசன முறையில் முக்கிய மாற்றங்களைச் செய்துள்ளது.

அதன்படி, நாளையும் அதற்கு அடுத்த நாட்களுமான மே 28-ஆம் தேதி (வியாழக்கிழமை) முதல் மே 31-ஆம் தேதி (ஞாயிற்றுக்கிழமை) வரை தொடர்ந்து நான்கு நாட்களுக்குக் கோயிலில் நடைமுறையில் உள்ள 100 ரூபாய் கட்டணத் தரிசன முறை முற்றிலும் ரத்து செய்யப்படுகிறது. இந்த நான்கு நாட்களிலும் கட்டணத் தரிசன வழிகள் அனைத்தும் பொதுவான தர்ம தரிசன வழிகளாக மாற்றப்பட்டு, அனைத்துப் பக்தர்களும் எவ்விதக் கட்டணமுமின்றி ஒரே வரிசையில் சென்று சுவாமி தரிசனம் செய்யச் சிறப்பு ஏற்பாடுகள் செய்யப்பட்டுள்ளன.

லட்சக்கணக்கான பக்தர்கள் ஒரே நேரத்தில் திரள்வதால் எற்படும் கூட்ட நெரிசலைக் கட்டுப்படுத்தவும், தடையற்ற பொதுத் தரிசனத்தை உறுதி செய்யவும் பலத்த பாதுகாப்பு ஏற்பாடுகள் செய்யப்பட்டுள்ளன. மேலும், தூத்துக்குடி மாவட்டக் காவல் துறை சார்பில் நூற்றுக்கணக்கான போலீஸார் பாதுகாப்புப் பணியில் ஈடுபடுத்தப்பட உள்ளனர்.