கோவில்பட்டி நகராட்சியை மத்திய அரசின் நக்சா திட்டத்தின்கீழ் நில ஆவணங்களை நவீனமாக்கும் திட்டம் துவக்க விழா நடைபெற்றது.
நாடு முழுவதும் நில ஆவணங்களை நவீனமாக்கும் திட்டம், ‘நக்சா’, மத்திய அரசால் கொண்டு வரப்பட்டுள்ளது. நகரத்தை டீரோன்கள் மூலம் போட்டோ எடுத்து, அதன் அடிப்படையில், சம்பந்தப்பட்ட புலங்களின் வருவாய் மற்றும் நகராட்சி நிர்வாகத் துறைகளின் பணியாளர்கள் அடங்கிய குழுக்களால் நவீன நில அளவு கருவிகளான ஓ.ஓ.பி.எஸ்., மற்றும் இ.டி.எஸ் கொண்டு நில அளவு செய்யப்படுகிறது.
பின்னர், புல வரைப்படம் தயார் செய்யப்படுகிறது. இந்தப் படத்தில் ஆட்சேபணைகள் இருந்தால் சம்பந்தப்பட்ட நில உரிமைதாரர்கள் உரிய அலுவலர்களிடம் மேல்முறையீடு செய்து கொள்ளலாம். அதன்பின் இறுதி செய்யப்பட்ட நகர்ப்புற நில ஆவணங்கள் வெளியிடப்படுகிறது. இறுதியாக, புவி அமைவிட புள்ளிகளுடன் கூடிய புல வரைபடங்களும், சொத்துவரி தொடர்பான தரவுகளுடன் ஒருங்கிணைக்கப்பட்ட நில ஆவணங்கள் உரிமைதாரர்களுக்கு வழங்கப்படுகிறது.
இந்த திட்டத்தில், தமிழகத்தில் கோவில்பட்டி உட்பட 10 நகராட்சிகள் தேர்வு செய்யப்பட்டுள்ளது. கோவில்பட்டி இத்திட்டம் துவக்கவிழா நேற்று நடந்தது. நகர் மன்ற தலைவர் கருணாநிதி தலைமை வகித்தார். நகராட்சி ஆணையாளர் கமலா முன்னிலை வகித்தார். துாத்துக்குடி நில அளவை மற்றும் பதிவேடுகள் துறை உதவி இயக்குனர் சீனிவாசகன் வரவேற்றார். திட்டத்தை துாத்துக்குடி மாவட்ட வருவாய் அலுவலர் ரவிச்சந்திரன் துவக்கி வைத்தார். கோவில்பட்டி நகரமைப்பு அலுவலர் சேதுராஜன் நன்றி கூறினார்.
