தூத்துக்குடி பாளைரோட்டில் ஐந்தினை பூங்காவை கால்பந்து மைதானமாக மாற்றக் கூடாது என்று சமூக ஆர்வலர்கள் மற்றும் தமிழ் ஆர்வலர்கள் கோரிக்கை விடுத்துள்ளனர்.
தூத்துக்குடி பாளையங்கோட்டை சாலையில் வஉசி கல்லூரி முன்பு ஸ்மார்ட் சிட்டி திட்டத்தின்கீழ் ரூ.57.10 கோடி மதிப்பீட்டில் மானுடவியல் பூங்கா, ஐந்திணை பூங்கா, கோளரங்கம், போக்குவரத்து பூங்கா ஆகியவை ஒரே பகுதியில் அமைக்கப்பட்டுள்ளன. இந்த பூங்காக்களை கடந்த 2022ஆம் ஆண்டு தமிழக முதல்வர் மு.க.ஸ்டாலின் சென்னை தலைமை செயலகத்தில் இருந்து காணொலி காட்சி மூலம் திறந்து வைத்தார்.
இதில் ஐந்திணை என்பது தமிழர்களின் வாழ்வியலை பிரதிபலிக்கும் வகையில் குறிஞ்சி, முல்லை, மருதம், நெய்தல், பாலை என்ற 5 பிரிவு நிலம் மற்றும் மக்களின் வாழ்வியல் குறித்த சிலைகள் உள்ளிட்ட அம்சங்கள் இடம்பெற்றுள்ளன. பல கோடி ரூபாய் மதிப்பில் கட்டப்பட்ட இந்த பூங்கா திறப்புவிழா கண்ட சில நாட்களிலேயே பூங்கா மூடப்பட்டது. பொதுமக்கள் அதனை பயன்படுத்த முடியாத நிலை ஏற்பட்டது.
இதன் அருகே பாேக்குவரத்து பூங்கா அமைக்கப்பட்டிருந்தது. போக்குவரத்து விதிகள் குறித்து மாணவ, மாணவிகள் அறிந்து காெள்ளும் வகையில் அமைக்கப்பட்ட இந்த பூங்காவை தற்போது மகளிர் பூங்காவாக மாற்றியுள்ளனர். மேலும் தற்போது ஐந்திணை பூங்காவை கால்பந்து மைதானமாக மாற்ற மாநகராட்சி நிர்வாகம் நடவடிக்கை மேற்கொண்டு வருவதாக தகவல் வெளியாகி உள்ளது. இதற்கு தமிழ் ஆர்வலர்கள் மற்றும் சமூக ஆர்வலர்கள் பலரும் எதிர்ப்பு தெரிவித்து வருகின்றனர்.
இது தொடர்பாக சமூக ஆர்வலர் சிவராம் என்பவர் கூறுகையில், தூத்துக்குடியில் பல கோடி மதிப்பில் அமைக்கப்பட்ட பூங்காக்கள் மாற்றப்பட்டு மக்களின் வரிப்பணம் வீணடிக்கப்பட்டு வருகிறது. தற்போது, தமிழர்களின் பாரம்பரியத்தை பறைசாற்றும் வகையில் உள்ள ஐந்திணை பூங்காவை கால்பந்து மைதானம் மாற்ற மாநகராட்சி நடவடிக்கை எடுத்து வருகிறது. கால்பந்து மைதானம் இளைஞர்களுக்கு பயனுள்ளதாக இருக்கும். எனினும், ஐந்திணை பூங்காவை மாற்றாமல், கால்பந்து மைதானத்தை வேறு இடத்தில் அமைக்க வேண்டும் என தெரிவித்தார்.
