தூத்துக்குடி மாவட்ட ஆட்சியர் அலுவலகக் கூட்டரங்கில், மாவட்ட ஆட்சியர் கி.செந்தில்ராஜ், தலைமையில் மக்கள் குறைதீர்க்கும் நாள் கூட்டம் நடைபெற்றது.
இன்று நடைபெற்ற மக்கள் குறைதீர்க்கும் நாள் கூட்டத்தில், பொதுமக்களிடமிருந்து கல்வி உதவித்தொகை, இலவச வீட்டுமனைப்பட்டா, பட்டா மாறுதல் உத்தரவு, வரன்முறைப் படுத்தி பட்டா, தொழில் கடனுதவி, முதியோர் உதவித்தொகை, விதவை உதவித்தொகை, வேலைவாய்ப்பு உள்ளிட்ட பல்வேறு கோரிக்கைள் அடங்கிய 341 கோரிக்கை மனுக்கள் பெறப்பட்டது. பெறப்பட்ட கோரிக்கை மனுக்கள் மீது உரிய நடவடிக்கை மேற்கொள்ளுமாறு துறைசார்ந்த அலுவலர்களுக்கு மாவட்ட ஆட்சியர் அறிவுறுத்தினார்.
அதனைத்தொடர்ந்து, ஸ்ரீவைகுண்டம் வட்டம் தோழப்பண்ணையைச் சேர்ந்த இசக்கிராஜன் வேலாயுதம் என்பவர் ஓமன் (மஸ்கட்) நாட்டில் பணிபுரிந்த போது காலமானதால் அவரது இறப்பிற்காக வரப்பெற்ற இழப்பீட்டுத் தொகை ரூ.1,52,272/-க்கான காசோலையினை அவரது வாரிசுதாரரான ராஜங்கரி (மனைவி) என்பவரிடம் மாவட்ட ஆட்சியர் வழங்கினார்.
வருவாய் மற்றும் பேரிடர் மேலாண்மைத்துறை சார்பில், எட்டையபுரம் வட்டம் வெம்பூர் கிராமத்தைச் சேர்ந்த வெங்கடேஸ்வரி என்பவர் இலவச வீட்டுமனைப்பட்டா வேண்டி விண்ணப்பித்ததைத் தொடர்ந்து, அவரது கோரிக்கை மனு பரிசீலனை செய்யப்பட்டு ஏற்றுக்கொள்ளப்பட்டதன் அடிப்படையில் அவருக்கு இலவச வீட்டுமனைப்பட்டாவினை மாவட்ட ஆட்சியர் வழங்கினார். மேலும், உணவுப்பொருள் வழங்கல் துறை மற்றும் நுகர்வோர் பாதுகாப்புத்துறை சார்பில், தூத்துக்குடி வட்டத்தை சேர்ந்த 127 பயனாளிகளுக்கு மின்னணு குடும்ப அட்டைகளை மாவட்ட ஆட்சியர் வழங்கினார்.
முன்னதாக, மாவட்ட ஆட்சியர் ஆட்சியர், மாவட்ட ஆட்சியர் அலுவலகத்தில் மாற்றுத்திறனாளிகளை நேரில் சந்தித்து, தொழிற்கடனுதவி, இலவச வீட்டுமனைப் பட்டா, உதவித்தொகை, இணைப்புச் சக்கரம் பொருத்தப்பட்ட பெட்ரோல் ஸ்கூட்டர், வேலைவாய்ப்பு உள்ளிட்ட கோரிக்கைகள் அடங்கிய 30 கோரிக்கை மனுக்களைப் பெற்றுக்கொண்டு, அவர்களின் கோரிக்கைகளைக்கனிவுடன் கேட்டறிந்து, பெறப்பட்ட கோரிக்கை மனுக்கள் மீது உரிய நடவடிக்கை மேற்கொள்ளுமாறு துறை சார்ந்த அலுவலருக்கு அறிவுறுத்தினார்கள்.
இக்கூட்டத்தில், மாவட்ட வருவாய் அலுவலர் ச.அஜய்சீனிவாசன், கூடுதல் ஆட்சியர் (வளர்ச்சி) தாக்கரே சுபம் ஞானதேவ் ராவ், உட்பட அனைத்துத்துறை அரசு அலுவலர்கள் பலர் கலந்துகொண்டனர்.


