பாண்டியனின் தலைநகராக விளங்கிய கொற்கையை பாலகிருஷ்ணன் ஐ.ஏ.எஸ் பார்வையிட்டார். அவருடன் தூத்துக்குடி மாவட்ட ஆட்சி தலைவர் மரு.கி.செந்தில்ராஜ் வருகை தந்தார்.
தூத்துக்குடி மாவட்டம், ஏரல் அருகே உள்ளது கொற்கை. இந்த கொற்கை சுமார் 2500 ஆண்டுகளுக்கு முன்பு பாண்டியனின் தலைநகராகவும், புகழ்பெற்ற துறைமுகபட்டிணமாகவும் விளங்கியுள்ளது. இங்கிருந்து வெளிநாடுகளுக்கு ஏற்றுமதி, இறக்குமதி நடந்துள்ளது. அரபு குதிரையை இறக்குமதி செய்தும், இங்கு விளையும் முத்துக்கள், மயில் தோகை உள்பட பல பொருள்களை ஏற்றுமதி செய்துள்ளனர். பெரிபுருஸ், தாலமி போன்றோர் இத்துறைமுகத்தினை போற்றி புகழ்ந்துள்ளனர்.
இந்த கொற்கை துறைமுகத்தினை டாக்டர் கால்டுவெல் ஆய்வு செய்து உலகிற்கு தெரிவித்தார். மேலை நாட்டு அறிஞர்கள் இங்கு கிடைத்த காசுகளை திருநெல்வேலி காசு என்ற தலைப்பில் நூலாகவும் வெளியிட்டுள்ளார். கொற்கையை தொல்லியல் ஆய்வாளர் நாகசாமி 1966&67 ல் ஆய்வு செய்தார். மேலும் கடந்த வருடம் இவ்விடத்தில் மாநில அரசு சார்பில் மாநில அகழாய்வு இயக்குனர் தங்கதுரை தலைமையில் ஆசைதம்பி, காளிஸ்வரன் கொண்ட குழுவினர் ஆய்வு செய்தனர். தற்போது இதன் ஆய்வறிக்கை தயார் செய்ய இங்கு கிடைத்தபொருள்கள் தஞ்சாவூருக்கு கொண்டு செல்லப்பட்டு அங்கே ஆய்வு நடத்தப்பட்டு வருகிறது.
இந்த நிலையில் கொற்கை துறைமுகத்தை கண்டுபிடிக்கும் நோக்கத்தோடு தமிழக தொல்லியல் துறை சார்பில் கடல்சார் ஆய்வு தொடங்கப்படும் என முதலமைச்சர் ஸ்டாலின் அறிவித்து இருந்தார். அதனை தொடர்ந்து கடந்த 2 மாதங்களுக்கு முன்பு தூத்துக்குடி துறைமுகத்தில் இருந்து திருச்செந்தூர் வரை கடல்வழியாக கடல்சார் ஆய்வு மேற்கொள்வதற்கு முன்பாக முன்கள ஆய்வு மேற்கொள்ளப்பட்டது.

இந்த ஆய்வை தொல்லியல் துறை அமைச்சர் தங்கம் தென்னரசு துவக்கி வைத்தார். அப்போது அமைச்சர்கள் கீதாஜீவன், அனிதா ராதாகிருஷ்ணன், மாவட்ட ஆட்சியர் மரு.கி.செந்தில்ராஜ் ஆகியோர் உடனிருந்தனர்.
இந்த நிலையில் தூத்துக்குடி மாவட்ட ஆட்சியர் செந்தில்ராஜ் கொற்கைக்கு திடீர் ஆய்வு மேற்கொண்டார். அதனை தொடர்ந்து பாலகிருஷ்ணன் ஐ.ஏ.எஸ். கொற்கையை பார்வையிட வந்தார். அவர் வந்த நேரத்தில் மழை பெய்யதது. குடை பிடித்தப்படியே அவர் ஒவ்வொரு இடமாக சென்று பார்வையிட்டார். அவர் கொற்கையில் உள்ள சுற்றுலா விளக்க கட்டிடத்தில் கடந்த வருடம் நடந்த அகழாய்வில் கிடைத்து பாதுகாப்பாக வைத்திருந்த அகழாய்வு பொருட்களை பார்வையிட்டார். தொடர்ந்து அருகில் இருந்த 2500 ஆண்டுகள் பழமையான வன்னிமரத்தை பார்வையிட்டார். அதைத்தொடர்ந்து வெற்றிவேல் செழியநங்கை கோயில் என்றழைக்கப்படும் கண்ணகி கோயில் மற்றும் கொற்கை குளத்தினை அவர் பார்வையிட்டார். அவருக்கு தொல்லியல் துணை இயக்குனர் காளீஸ்வரன், அவருக்கு எழுத்தாளர் முத்தாலங்குறிச்சி காமராசு விளக்கமளித்தார்.
பின்னர் அக்கசாலை விநாயகர் கோவிலில் உள்ள கல்வெட்டுகளை பார்வையிட்டு, அங்குள்ள கல்வெட்டுகள் குறித்து கோவில் பூசாரியிடம் கேட்டறிந்தார். இந்த நிகழ்ச்சியில் மாவட்ட ஆட்சி தலைவர் மரு.கி. செந்தில்ராஜ், ஏரல் தாசில்தார் கண்ணன், அகழாய்வு இணை இயக்குனர் காளீஸ்வ்ரன், ஆறுமுகமங்கலம் வருவாய் ஆய்வாளர் முத்துசரவணன், கொற்கை கிராம நிர்வாக அதிகாரி காளிராஜ், எழுத்தாளர் முத்தாலங்குறிச்சி காமராசு, சமூகசேவகர் காமராஜ் காந்தி, பெருமாள் பட்டர் உள்பட பலர் கலந்து கொண்டனர்.


