தீவிபத்தில் சேதம் அடைந்த தூத்துக்குடி அனல்மின் நிலைய 3-வது யூனிட்டில் மின்உற்பத்தி தொடங்கியது.
தூத்துக்குடி அனல்மின் நிலையத்தில் தலா 210 மெகாவாட் மின்உற்பத்தி திறன் கொண்ட 5 மின்உற்பத்தி எந்திரங்கள் இயங்கி வந்தன. கடந்த மாதம் 15-ந் தேதி இந்த அனல்மின் நிலையத்தில் பயங்கர தீவிபத்து ஏற்பட்டது. சுமார் 18 மணி நேரம் போராடி தீயணைப்பு வீரர்கள் தீயை அணைத்தனர்.
இதன் காரணமாக அனல்மின் நிலையத்தில் உள்ள 1, 2-வது எந்திரங்கள் பெரிதும் சேதம் அடைந்தன. 3-வது எந்திரத்திலும் லேசான பாதிப்பு ஏற்பட்டது. இதுதொடர்பாக மின்சார வாரிய அதிகாரிகள் ஆய்வு செய்தனர். கோடை காலம் என்பதால் உடனடியாக மின்சார உற்பத்தியை தொடங்குவதற்கான நடவடிக்கையை மேற்கொண்டனர்.
இதைத்தொடர்ந்து குறைவான சேதமடைந்த 3-வது எந்திரம் சீரமைக்கும் பணி நடந்து வந்தது. இந்த பணிகள் முடிக்கப்பட்டு சுமார் 2½ வாரங்களுக்கு பிறகு நேற்று காலை முதல் 3-வது மின்உற்பத்தி எந்திரத்தில் மீண்டும் மின்சாரம் உற்பத்தி தொடங்கியது. இதில் படிப்படியாக மின்உற்பத்தி அதிகரிக்கப்பட்டது. இந்த அனல்மின் நிலையத்தில் 3, 4, 5 ஆகிய எந்திரங்கள் மூலம் சுமார் 630 மெகாவாட் மின்சாரம் உற்பத்தி செய்யப்படுவதாக அதிகாரிகள் தெரிவித்தனர்.
1, 2-வது எந்திரங்கள் சேதமடைந்ததால் 420 மெகாவாட் மின்சாரம் உற்பத்தி பாதிக்கப்பட்டு உள்ளது. அந்த எந்திரங்களையும் போர்க்கால அடிப்படையில் உடனடியாக சரி செய்து மின் உற்பத்தியை தொடங்க வேண்டும் என்று மின்வாரிய தொழிற்சங்கத்தினர் கோரிக்கை விடுத்து உள்ளனர்.
