கழுகுமலையில் மோட்டார் சைக்கிள் திருடிய 2 சிறுவர்கள் சீர்திருத்த பள்ளியில் அடைக்கப்பட்டனர்.
தூத்துக்குடி மாவட்டம், கழுகுமலை திருமாளிகை தெருவை சேர்ந்த செல்வராஜ் மகன் காலேப்ராஜ் (28). டிரைவர். சம்பவத்தன்று இரவில் இவரது வீட்டின் முன்பு மோட்டார் சைக்கிளை நிறுத்திவிட்டு தூங்க சென்று விட்டார். மறுநாள் காலையில் பார்த்தபோது மர்மநபர்கள் அந்த மோட்டார் சைக்கிளை திருடி சென்றது தெரிய வந்தது.
இதுகுறித்துஅவர் அளித்த புகாரின் பேரில், கழுகுமலை போலீஸ் சப்-இன்ஸ்பெக்டர் துரைசாமி வழக்கு பதிவு செய்து விசாரணை நடத்தி வந்தார். மேலும், அப்பகுதியில் உள்ள கண்காணிப்பு கேமரா காட்சிகளை ஆய்வு செய்தபோது, கூலி தொழிலாளியாக வேலை பார்த்து வரும் கழுகுமலை அம்பேத்கர் நகர் பகுதியை சேர்ந்த 14 வயது சிறுவனும், 17 வயது சிறுவனும் மோட்டார் சைக்கிளை திருடி சென்றது தெரிய வந்தது.
இதை தொடர்ந்து தலைமறைவாக இருந்த அந்த 2 சிறுவர்களையும் போலீசார் கைது செய்தனர். அவர்களிடம் இருந்து மோட்டார் சைக்கிள் மீட்கப்பட்டது. இதையடுத்து கோர்ட்டில் ஆஜர் செய்யப்பட்ட அந்த 2 சிறுவர்களும் தூத்துக்குடி சிறுவர் சீர்திருத்த பள்ளியில் அடைக்கப்பட்டனர்.
