தூத்துக்குடி மக்களுக்கு சுகாதாரமான குடிநீர் வழங்கப்படுகிறது : மேயர் தகவல்

தூத்துக்குடி மக்களுக்கு சுகாதாரமான குடிநீர் வழங்கப்பட்டு வருகிறது என்று மாநகராட்சி கூட்டத்தில் மேயர் ஜெகன் பெரியசாமி தெரிவித்தார்.

தூத்துக்குடி மாநகராட்சி சாதாரண கூட்டம் மேயர் ஜெகன் பெரியசாமி தலைமையில் இன்று காலை நடந்தது. மாநகராட்சி ஆணையர் மதுபாலன்,  துணை மேயர் ஜெனிட்டா செல்வராஜ் ஆகியோர் முன்னிலை வைத்தனர். கூட்டத்தை தொடங்கி வைத்து மேயர் பேசியதாவது “தமிழக துணை முதல்வராக பதவி ஏற்றுள்ள உதயநிதி ஸ்டாலினுக்கு இந்த மாமன்றம் வாழ்த்துக்களையும் நன்றியையும் தெரிவித்துக் காெள்கிறது.

தூத்துக்குடியில் பல்வேறு இடங்களில் பாதாள சாக்கடை அமைக்கும் பணிகள் முடிவடையும் நிலையில் உள்ளது. பருவ மழையை முன்னிட்டு கொண்டு மழைநீர் தேங்காத அளவிற்கு சாக்கடையில் தண்ணீர் செல்வதற்கு அனைத்து ஏற்பாடுகள் செய்யப்பட்டுள்ளது. பக்கிள் ஓடை முழுவதும் சீரமைக்கப்பட்டு மழைநீர் செல்வதற்கு வழிவகை செய்யப்பட்டுள்ளது.

கூட்டத்தில் அதிமுக கொறடா வழக்கறிஞர் மந்திரமூர்த்தி பேசும் போது “தாமிரபரணி ஆற்றில் கழிவுநீர் கலப்பதால் தூத்துக்குடிக்கு வரும் குடிநீரில் சாக்கடை நீரும் கலந்து வருகிறது. இதனால் வல்லநாட்டில் தண்ணீரை சுத்தப்படுத்தி சுகாதாரமாக தண்ணீர் சப்ளை செய்ய வேண்டும் என்றார்.

இதற்கு பதில் அளித்த மேயர் “தாமிரபரணி ஆற்றில் கழிவு நீர் கலக்கவில்லை. இது வெறும் வதந்தி தான். தூத்துக்குடிக்கு சுத்தமான சுகாதாரமான குடிதண்ணீர் விநியோகம் செய்யப்பட்டு வருகிறது என்றார்.

அதிமுக கவுன்சிலர் மந்திரமூர்த்தி “தூத்துக்குடி தெப்பக்குளத்தில் மீன்கள் அதிகளவில் இறந்து கிடக்கிறது. இதனால் சுகாதார சூர்கேடு ஏற்படுவதாக தெரிவித்தார். இதற்கு எதிர்ப்பு தெரிவித்து திமுக கவுன்சிலர் சுரேஷ்குமார் இவர்களே செத்த மீன்களை தெப்பகுளத்தில் போட்டு விட்டு இங்கு நாடகம் ஆடுகிறார்கள் என்றார். இதைத் தொடர்ந்து அதிமுக கொறடா மந்திரமூர்த்திக்கும் திமுக கவுன்சிலர் சுரேஷ்குமார் கடும் வாக்குவாதம் ஏற்பட்டது.