சாத்தான்குளம், உடன்குடி, திருச்செந்தூர் மற்றும் ஸ்ரீவைகுண்டம் பகுதியில் உள்ள குக்கிராமங்களுக்கும் அடுத்த ஓரிரு நாட்களில் சீரான குடிநீர் விநியோகம் செய்யப்படும் என மாவட்ட ஆட்சியர் கி.செந்தில்ராஜ் தெரிவித்தார்.
தூத்துக்குடி மாவட்டம் ஸ்ரீவைகுண்டம் வட்டம் பொன்னன்குறிச்சி கிராமத்தில் தாமிரபரணி ஆற்றில் இருந்து சாத்தான்குளம், உடன்குடி, திருச்செந்தூர் மற்றும் ஸ்ரீவைகுண்டம் பகுதிகளுக்கு குடிநீர் எடுத்துச் செல்வது குறித்து மாவட்ட ஆட்சியர் கி.செந்தில்ராஜ் இன்று (25.06.2023) பார்வையிட்டு தெரிவித்ததாவது: தூத்துக்குடி மாவட்டத்தின் தென் பகுதியில் இருக்கின்ற சாத்தான்குளம், உடன்குடி, ஸ்ரீவைகுண்டம், திருச்செந்தூர் பகுதி மக்களுக்கு தண்ணீர் எந்த அளவுக்கு செல்கிறது என்று இன்று ஸ்ரீவைகுண்டம் சட்டமன்ற உறுப்பினர் அவர்களுடன் இணைந்து ஆய்வு செய்தோம்.
பொதுப்பணித்துறை, குடிநீர் வழங்கல்துறை, வருவாய்த்துறை உள்ளிட்ட அனைத்து துறையினருடன் இணைந்து ஆய்வு செய்யப்பட்டது. தூத்துக்குடி மாவட்டம் முழுவதும் தாமிரபரணி நதியில் இருந்து கூட்டுக்குடிநீர் திட்டம் மூலம் குடிநீர் விநியோகம் செய்யப்பட்டு வருகிறது. வல்லநாடு, பொன்னங்குறிச்சி, குரங்கணி ஆகிய பகுதிகளில் இருந்து தண்ணீர் எடுக்கப்படுகிறது. சாத்தான்குளம் பகுதிக்கு 308 குடிநீர் திட்டம் மூலம் 9 இடங்களிலும், திருச்செந்தூர் பகுதிக்கு 109 குடிநீர் திட்டம் மூலம் 5 இடங்களிலும் கிணறுகள் அமைத்து தண்ணீர் எடுக்கப்படுகிறது.
வடகிழக்கு பருவமழை சரியாக பெய்யாததால் மணிமுத்தாறு, பாபநாசம் அணைகளில் தண்ணீர் வரத்து குறைவாக உள்ளது. இருப்பினும் ஒரு மாதத்திற்கு தேவையான தண்ணீர் சேமித்து வைக்கப்பட்டுள்ளது. தாமிரபரணி நதியில் தண்ணீர் வரத்து குறைவாக உள்ளதால் சாத்தான்குளம் மற்றும் திருச்செந்தூர் பகுதிக்கு தண்ணீர் எடுக்கப்படும் கிணறுகளிலும் தண்ணீர் குறைவாக உள்ளது. இந்த கிணறு அமைந்துள்ள நதி பகுதியில் வடக்கு ஓரத்தில் தண்ணீர் செல்கிறது. இதனை தென் பகுதிக்கு திருப்பிவிட நடவடிக்கை எடுக்கப்பட்டுள்ளது.
இன்று மாலைக்குள் கிணறு அமைந்துள்ள பகுதிக்கு தண்ணீர் வந்துவிடும். இங்குள்ள மோட்டார்களும் தயார் நிலையில் உள்ளன. அதேபோல் தண்ணீர் செல்லும் குழாய்களிலும் கசிவு ஏதும் உள்ளதா என்று ஆய்வு செய்து சரிசெய்வதற்கு நடவடிக்கை எடுக்கப்பட்டுள்ளது. அடுத்த ஓரிரு நாட்களில் சாத்தான்குளம், திருச்செந்தூர் பகுதியில் உள்ள குக்கிராமங்களுக்கும் தண்ணீர் விநியோகம் சீராக வழங்கப்படும். தாமிரபரணி நதியில் 2 அல்லது 3 ஆண்டுகளுக்கு ஒரு முறைதான் தண்ணீர் வரத்து அதிகரித்து கடலுக்கு வீணாக செல்கிறது. கடந்த 2020ம் ஆண்டு 90,000 கன அடி நீர் கடலுக்கு சென்றது. நமது மாவட்டத்தில் மருதூர், ஸ்ரீவைகுண்டம் அணைக்கட்டுகள் உள்ளது.
ஸ்ரீவைகுண்டம் அணைக்கட்டில் இருந்து வடகால், தென்கால் கால்வாய்கள் மூலமும், மருதூர் அணைக்கட்டில் இருந்து கீழக்கால், மேலக்கால் கால்வாய்கள் மூலமும் குளங்களுக்கு தண்ணீர் செல்கிறது. மேலும் மருதூர் அணைக்கட்டில் இருந்து சடையனேரி கால்வாய் மூலம் புத்தன்தருவை வரை தண்ணீர் செல்கிறது. இந்த 4 கால்வாய்கள் மற்றும் குளங்களை தூர்வாரி கொள்ளளவை அதிகப்படுத்த திட்டமிடப்பட்டுள்ளது. மேலும் ஆழ்வார்தோப்பு பகுதியில் ஒரு அணைக்கட்டு கட்டுவதற்கு ஆரம்பித்துள்ளோம். ஏற்கனவே புன்னக்காயல் பகுதியில் 3 தடுப்பணைகள் கட்டியுள்ளோம். வருங்காலங்களில் தாமிரபரணி நதியில் வரும் தண்ணீரை சேமிக்க நடவடிக்கை எடுக்கப்படும்.
திருநெல்வேலி மாவட்டத்தில் உள்ள கருமேனியாறு – நம்பியாறு திட்டத்தின் பணிகள் முடிந்து தமிழ்நாடு முதலமைச்சர் அவர்களால் விரைவில் திறக்கப்பட உள்ளது. இத்திட்டத்தின் மூலம் தூத்துக்குடி மாவட்டத்தின் அரசூர், கொம்மடிக்கோட்டை வரை கால்வாய் வருகிறது. எனவே நமது மாவட்டத்திற்கு கூடுதலாக தண்ணீர் கிடைக்கும். ஊராட்சிகளுக்கு வழங்கப்படும் தண்ணீர் மேல்நிலை நீர்தேக்க தொட்டிகளுக்கு ஏற்றுவதற்கு முன்பு குளோரின் அளவு பரிசோதிக்கப்பட்டு சுகாதாரமான குடிநீர்தான் பொதுமக்களுக்கு வழங்கப்படுகிறது என மாவட்ட ஆட்சியர் தெரிவித்தார்.
ஆய்வில் ஸ்ரீவைகுண்டம் சட்டமன்ற உறுப்பினர் ஊர்வசி எஸ்.அமிர்தராஜ், தாமிரபரணி வடிநில கோட்டம் செயற்பொறியாளர் மாரியப்பன், உதவி செயற்பொறியாளர் ஆதிமூலம், ஸ்ரீவைகுண்டம் வட்டாட்சியர் சிவக்குமார், வட்டார வளர்ச்சி அலுவலர்கள், குடிநீர் வடிகால் வாரிய அலுவலர்கள் மற்றும் பலர் கலந்துகொண்டனர்.


