கோவில்பட்டியில் சாலையில் நடந்து சென்றபோது வாகனம் மோதி பலத்த காயமடைந்த தொடக்க வேளாண்மை கூட்டுறவு வங்கி விற்பனையாளர் உயிரிழந்தார்.
திருவேங்கடம் வட்டம், நடுவப்பட்டி நடுத்தெருவைச் சேர்ந்த ராமர் மகன் சந்திரன் (59). தொடக்க வேளாண்மை கூட்டுறவு வங்கியில் விற்பனையாளராக வேலை செய்து வந்த இவர் நேற்று முன்தினம் கோவில்பட்டிக்கு வந்திருந்தாராம்.
இந்நிலையில் இரவு கோவில்பட்டி அண்ணா பேருந்து நிலையம் அருகே நடந்து சென்றபோது, அவர் மீது அடையாளம் தெரியாத வாகன மோதியதில் பலத்த காயமடைந்த சந்திரன் கோவில்பட்டி அரசு மருத்துவமனையில் முதலுதவி சிகிச்சைக்கு பின் தீவிரசிகிச்சைக்காக தூத்துக்குடி அரசு மருத்துவக் கல்லூரி மருத்துவமனையில் அனுமதிக்கப்பட்டார். ஆனால் அங்கு அவர் நேற்று உயிரிழந்தார். இதுகுறித்து மேற்கு காவல் நிலைய போலீசார் வழக்குப் பதிந்து விசாரித்து வருகின்றனர்.
