திருச்செந்தூர் சுப்பிரமணிய சுவாமி கோவில் சூரசம்ஹாரம் முன்னேற்பாடு பணிகளை கனிமொழி எம்.பி நேரில் ஆய்வு செய்தார்.
திருச்செந்தூர் அருள்மிகு சுப்பிரமணிய சுவாமி திருக்கோவில் கந்த சஷ்டி திருவிழா 13.11.2023 முதல் நடைபெற்றுவருவதைத் தொடர்ந்து, மாவட்ட நிர்வாகம் சார்பில், பல்வேறு பகுதிகளிலிருந்து சாமிதரிசனம் செய்வதற்காக வருகைதரும் பக்தர்களுக்கு தேவையான வசதிகள் ஏற்படுத்தப்பட்டுள்ளதை உறுதிசெய்யும் வகையில் தூத்துக்குடி பாராளுமன்ற உறுப்பினர் கனிமொழி கருணாநிதி, மீன்வளம்-மீனவர் நலன் மற்றும் கால்நடை பராமரிப்புத்துறை அமைச்சர் அனிதா ஆர்.ராதாகிருஷ்ணன், மாவட்ட ஆட்சியர் கோ.லட்சுமிபதி, ஆகியோர் முன்னிலையில் இன்று (16.11.2023) நேரில் பார்வையிட்டு ஆய்வு மேற்கொண்டார்கள்.
பின்னர், கனிமொழி எம்பி செய்தியாளரிடம் தெரிவிக்கையில், திருச்செந்தூர் அருள்மிகு சுப்பிரமணிய சுவாமி திருக்கோவில் கந்த சஷ்டி திருவிழா ஆண்டுதோறும் வெகுவிமர்சையாக நடக்கக்கூடிய திருவிழா. இந்த ஆண்டு கந்த சஷ்டி திருவிழா 13.11.2023 முதல் 24.11.2023 வரை நடைபெறுகிறது. இதில் கந்த சஷ்டி திருவிழாவின் முக்கிய நிகழ்வாக சூரசம்ஹாரம் நிகழ்ச்சி வருகின்ற 18.11.2023 அன்று நடைபெறவுள்ளது. இந்த திருவிழாவிற்கு பல்வேறு மாவட்டங்களிலிருந்து மட்டும்மல்லாமல் பல நாடுகளிலிருந்து மக்கள் வருகைதந்து பங்கேற்கக்கூடிய விழாவாக ஒவ்வொரு ஆண்டும் நடைபெற்றுக்கொண்டிருக்கிறது.
அந்த ஆண்டு ஏறத்தாழ 10 இலட்சம் மக்கள் கந்த சஷ்டி திருவிழாவில் கலந்துகொள்வார்கள் என்று எதிர்பார்க்கப்படுகிறது. இதுவரைக்கும் சுமார் 3 இலட்சத்திற்கு மேல் பக்தர்கள் அருள்மிகு சுப்பிரமணிய சுவாமி திருக்கோவிலுக்கு வந்து சென்றுள்ளார்கள். அன்னதானக் கூடத்திலே இதுவரை சுமார் 20 ஆயிரத்திற்கும் மேல் பக்தர்கள் உணவு அருந்திருக்கிறார்கள். கந்த சஷ்டி திருவிழாவில் வருகைதரும் பக்தர்கள் தங்குவதற்காக 22 தற்காலிக பந்தல்கள் போடப்பட்டிருக்கிறது. 70 ஆயிரம் சதுர அடி பரப்பளவில் நிரந்தர பந்தல் உள்ளது. ஆண்களுக்காக 225 கழிப்பிடங்களும் அமைக்கப்பட்டுள்ளது.
பெண்களுக்காக 240 கழிப்பிடங்களும் அமைக்கப்பட்டுள்ளது. இருபலர்களுக்கும் தனித்தனியாக 14 குளியல் தொட்டிகள் அமைக்கப்பட்டுள்ளது. 200 இடங்களில் குடிநீர் வசதிகள் ஏற்பாடு செய்யப்பட்டுள்ளது. ஒரு நாளைக்கு 5 இலட்சம் லிட்டர் தண்ணீர் வருகைதரும் பக்தர்களுக்கு வழங்கப்பட்டு வருகிறது. மேலும், 13 இடங்களில் வாகனங்கள் நிறுத்திமிடம் ஏற்பாடு செய்யப்பட்டுள்ளது. கந்த சஷ்டி திருவிழாவிற்கு வருகைதரும் முதியோர்கள், மாற்றுத்திறனாளிகள் மற்றும் கர்ப்பிணி பெண்கள் கோவிலுக்குள் செல்வதற்கு வசதியாக கூடுதலாக 3 பேட்டரி வாகனங்கள் வழங்கப்படவுள்ளது. தொடர்ந்து, மருத்துவ முகாம், பெண்கள் சஷ்டி விரதம் இருக்கும் இடம், அன்னதானக்கூடம் உள்ளிட்ட இடங்களில் ஆய்வு மேற்கொண்டபோது, பக்தர்கள் எங்களிடம் கூறும் போது சஷ்டி ஏற்பாடு மிகச்சிறப்பாக செய்யப்பட்டுள்ளது என்று மகிழ்ச்சியோடு கூறினார்கள்.
அருள்மிகு சுப்பிரமணிய சுவாமி திருக்கோவிலில் தர்ம தரிசனம் தொடர்ந்து நடைபெற்றுக்கொண்டு தான் இருக்கிறது. பக்தர்கள் கோவில் சன்னதிக்கு வந்து சென்றுதான் இருக்கிறார்கள். அது நிறுத்தப்படவே இல்லை. அதுமட்டும்மல்லாமல், கந்த சஷ்டி திருவிழாவிற்கு வருகைதரும் முதியோர்கள், மாற்றுத்திறனாளிகள் சிரமமின்றி சாமி தரிசனம் செய்ய தனியாக வரிசை ஏற்படுத்தப்பட்டுள்ளது. இது மக்கள் மத்தியில் வரவேற்பை பெற்றுள்ளது.
திருவிழா அபிஷேக கட்டணம் 200 ரூபாயிலிருந்து 2 ஆயிரம் ரூபாயாகவும், திருவிழா விஸ்வரூபத்திற்கான கட்டணம் 500 ரூபாயிலிருந்து 2 ஆயிரம் ரூபாயாகவும், கந்த சஷ்டி திருவிழா மற்றும் அபிஷேக கட்டணம் 500 ரூபாயிலிருந்து 3 ஆயிரம் ரூபாயாகவும் உயர்த்தப்பட்டது 2018ஆம் ஆண்டு. ஆகையால், அப்போது இருந்து இதே கட்டணம் தான் நடைமுறையில் உள்ளது. கந்த சஷ்டி திருவிழாவிற்கு வருகைதரும் பக்தர்களுக்கு தேவையான வசதிகள் அனைத்து ஏற்படுத்தப்பட்டுள்ளது. பக்தர்கள் அனைவரும் ஏற்பாடு எல்லாம் சிறப்பாக உள்ளது, உணவு சிறப்பாக உள்ளது என்று மகிழ்ச்சியோடு தெரிவித்தார்கள்.
அருள்மிகு சுப்பிரமணிய சுவாமி திருக்கோவில் வளாகத்தில் கிட்டதட்ட 11 இலட்சம் சதுர அடி பரப்பிளலான பழைய கட்டடங்கள் இடிக்கப்பட்டு, 6 இலட்சம் சதுர அடி பரப்பிளவில் திருப்பணிகள் நடைபெற்று வருகிறது. இந்த பணிகள் எல்லாம் முடிந்து இன்னும் சுலபமாக மக்கள் சாமி தரிசனம் செய்வதற்கான வாய்ப்பு உருவாக்கப்படும். அப்பொழுது தரிசனத்திற்கான கட்டணங்கள் எல்லாம் முறையாக நிர்ணயம் செய்யப்படும் என தூத்துக்குடி பாராளுமன்ற உறுப்பினர் திருமிகு.கனிமொழி கருணாநிதி தெரிவித்தார்கள்.
ஆய்வின்போது, அருள்மிகு சுப்பிரமணிய சுவாமி திருக்கோவில் அறங்காவலர் குழுத்தலைவர் இரா.அருள் முருகன், திருச்செந்தூர் நகர்மன்றத் தலைவர் சிவ ஆனந்தி, திருச்செந்தூர் நகர்மன்ற துணைத் தலைவர் ஏ.பி.ரமேஷ், திருச்செந்தூர் வருவாய் கோட்டாட்சியர் குருச்சந்திரன், மண்டல இணை ஆணையர் (இந்து சமய அறநிலையத்துறை) அன்பு மணி, திருச்செந்தூர் துணைக் காவல் கண்காணிப்பாளர்வசந்தராஜ், இணை ஆணையர் (திருச்செந்தூர் திருக்கோவில்) கார்த்திக், திருச்செந்தூர் வட்டாட்சியர் வாமனன் மற்றும் அலுவலர்கள் உடனிருந்தனர்.


