தூத்துக்குடியில் மீன்பிடித் தடைக்காலம் நிறைவடைந்த நிலையில் இன்று 225 விசைப்படகுகளில் மீனவா்கள் கடலுக்கு மீன்பிடிக்க சென்றனர்.
தூத்துக்குடியில் மீன்பிடி துறைமுகத்தில் இருந்து சுமார் 270 விசைப் படகுகளில் தினமும் கடலுக்கு மீனவர்கள் மீன் பிடிக்க சென்று வருகின்றனர். இதனிடையே மீன்களின் இனப்பெருக்கத்தைக் கருத்தில்கொண்டு, வங்கக் கடலில் ஏப். 15 முதல் ஜூன் 14 வரை 61 நாள்களுக்கு மீன்பிடித் தடைக்காலம் அமல்படுத்தப்பட்டது.
அதன்படி, நிகழாண்டு தடைக்காலம் தொடங்கி, ஜூன் 14ம் தேதி (சனிக்கிழமை) நள்ளிரவுடன் நிறைவடைந்தது. ஆனால் நேற்று ஞாயிற்றுக்கிழமை என்பதால் மீனவர்கள் கடலுக்கு செல்லவில்லை. இந்நிலையில் தூத்துக்குடி மீன்பிடி துறைமுகத்தில் இருந்து காலை 5 மணியளவில் 225 விசை படகுகளில் மீனவர்கள் கடலுக்கு மீன்பிடிக்க சென்றனர்.
