கோழி பண்ணையில் மின்சாரம் தாக்கி ஊழியர் பலி

மாசார்பட்டி அருகே மின்சாரம் தாக்கி கோழி பண்ணை ஊழியர் உயிரிழந்த சம்பவம் சோகத்தை ஏற்படுத்தியுள்ளது.

தூத்துக்குடி மாவட்டம் மாசார்பட்டி அருகில் உள்ள அச்சங்குளம் கிராமத்தைச் சேர்ந்தவர் சொக்கன் மகன் கருப்பசாமி (45). இவர் அங்குள்ள செல்வராஜ் என்பவரின் கோழி பண்ணையில் வேலை செய்து வந்துள்ளார். நேற்று மாலை கோழிப்பண்ணையில் வேலை செய்து கொண்டிருந்த போது எதிர்பாராத விதமாக மின்சாரம் தாக்கியதில் சம்பவ இடத்திலேயே பரிதாபமாக இறந்தார்

இதுகுறித்து தகவல் அறிந்த அவரது உறவினர்கள் கருப்பசாமி உடலை வீட்டிற்கு எடுத்துச் சென்றுள்ளனர். இதையடுத்து மாசார்பட்டி காவல் நிலைய ஆய்வாளர் கருப்பசாமி மற்றும் போலீசார் உறவினரிடம் பேச்சுவார்த்தை நடத்தி, கருப்பசாமி உடலை மீட்டு பரிசோதனைக்காக விளாத்திகுளம் அரசு மருத்துவமனைக்கு அனுப்பி வைத்தனர். மேலும் இது சம்பந்தமாக வழக்கு பதிவு செய்து விசாரணை நடத்தி வருகின்றனர்.