இந்தியாவில் 9.69 சதவீத மொத்த உள்நாட்டு உற்பத்தி வளர்ச்சியில் தமிழ்நாடு முதலிடத்தில் உள்ளது என அமைச்சர் பெ.கீதா ஜீவன் தெரிவித்தார்.
தூத்துக்குடியில் தமிழ்நாடு உணவு பதப்படுத்துவோர் சிறப்பு மாநாட்டை சமூக நலன் மற்றும் மகளிர் உரிமைத் துறை அமைச்சர் பெ.கீதா ஜீவன் தொடங்கி வைத்தார். நிகழ்ச்சியில் அவர் பேசியதாவது: உணவு பதப்படுத்தும் துறையில் புதிய தொழில்முனைவோர் மற்றும் ஸ்டார்ட் அப் நிறுவனங்களை ஊக்குவிக்க வேண்டும். இது 2030 ஆம் ஆண்டுக்குள் ஒரு டிரில்லியன் பொருளாதாரத்திற்கு பங்களிக்கும். இந்தியாவில் 9.69 சதவீத மொத்த உள்நாட்டு உற்பத்தி வளர்ச்சியில் தமிழ்நாடு முதலிடத்தில் உள்ளது.
மேலும் உணவு பதப்படுத்தும் துறை இந்த பொருளாதார வளர்ச்சிக்கு ஒரு முக்கிய உந்துதலாகும். தூத்துக்குடி போன்ற நகரங்கள் முழுமையான வளர்ச்சிக்கு, முதல்வர் மு.க.ஸ்டாலின் முன்னுரிமை அளித்துவருகிறார். உணவு பதப்படுத்துதல் மற்றும் குளிர்பதன சங்கிலி உள்கட்டமைப்பு மூலம் பதநீர், பனங்கல்கண்டு போன்ற உள்நாட்டு தயாரிப்புகளை ஆரோக்கியமான முறையில் மேம்படுத்துவதற்கான தேவை உள்ளது என்றார்.
