கயத்தாறில் பைக் மீது அரசு பஸ் மோதிய விபத்தில் காயமடைந்த நிலபுரோக்கர் சிகிச்சை பலனின்றி இறந்தார்.
தூத்துக்குடி மாவட்டம், நாகம்பட்டி வடக்கு தெருவைச் சேர்ந்த சன்முகையா மகன் கந்தசாமி (50). இவர் சம்பவத்தன்று காலையில் கயத்தாறில் இருந்து நெல்லை நோக்கி மோட்டார் சைக்கிளில் சென்றபோது, பின்னால் வந்த அரசு பஸ் எதிர்பாராத விதமாக மோதியதில் தூக்கி வீசப்பட்டு படுகாயம் அடைந்தார். அவரை மீட்டு நெல்லை அரசு மருத்துவமனையில் சேர்த்தனர்.
அங்கு தீவிர சிகிச்சை பெற்று வந்த அவர் நேற்று முன்தினம் இரவு பரிதாபமாக இறந்து போனார். இதுகுறித்து கயத்தாறு போலீஸ் இன்ஸ்பெக்டர் சுதாதேவி, சப்-இன்ஸ்பெக்டர் காசிலிங்கம் ஆகியோர் வழக்குப்பதிவு செய்து விசாரணை நடத்தி வருகின்றனர். இறந்துபோன கந்தசாமிக்கு மாரியம்மாள் என்ற மனைவியும் பத்ரகாளி(29) சங்கீதா(27) ஆகிய 2 மகள்களும் கலைச்செல்வன்(28) என்ற ஒரு மகனும் உள்ளனர்.
