தூத்துக்குடி விகாசா மேல்நிலைப் பள்ளியில் சிறப்பு வரலாற்று கண்காட்சி நடைபெற்றது.
தூத்துக்குடி விகாசா சர்வதேச மேல்நிலைப் பள்ளியின் வரலாற்றுத் தலைவர் வேல்முருகன் கோரிக்கையின்படி பட்டினமருதூர் கிராமத்தில் மேற்பரப்பு களப்பணியில் கண்டெடுத்து ஆவணப்படுத்தப்பட்ட வரலாற்று தொன்மங்கள் மற்றும் வரலாற்று தரவுகள் 04.01.2025 அன்று அருமையாக காட்சிப்படுத்தப்பட்டதாகவும், இந்த நிகழ்வு நமது மூதாதையரின் மறைந்த மற்றும் மறைக்கப்பட்ட நகரமான கயல் என்ற கீழ்பட்டினம் மற்றும் அதன் மிகப்பெரிய பொக்கிஷங்களைப் பற்றி மேலும் பல விரிவுரையாளர்கள், மாணவர்கள் மற்றும் பெற்றோர்களுக்குத் தெரியப்படுத்த பெரிதும் உதவியது என்றும், சான்றுகள் மற்றும் அந்தப் பகுதியில் உள்ள தடயங்கள் பற்றிய நமது அவதானிப்புகள் ஆகியவற்றை பொது தளத்தில் பகிர்ந்தது என்பது என்றாவது ஓர் நாள் நம் பண்டைய தமிழர்களின் பண்பட்ட நகர நாகரீகத்தின் உண்மை வெளிக்கொணர பேருதவியாக அமையும் என்பதில் மாற்றுக் கருத்து இல்லை என்றும்,
தற்போது வரை இந்த மேற்பரப்பில் கிடைத்த விதவிதமான மற்பாண்ட தொன்ம குறியீடுகள், பவளப்பாறையில் செய்யப்பட்ட சில விளையாட்டு மற்றும் கவன் குண்டு போன்றவைகள், படிக சிதைவுகள், இரு புறமும் மெருகூட்டபட்ட ஓடு சிதைவுகள், ஐம்பொன் கிரேக்கம் மற்றும் சீன நாணயங்கள், சோழர் கால மற்றும் பாண்டியர்கள் தங்கம் கலந்த நாணயங்கள், பீங்கான் மற்றும் கண்ணாடி சிதைவுகள், விளையாட்டு சில்லுகள் மற்றும் பொம்மைகள், 8ம் நூற்றாண்டின் தமிழ் வட்டெழுத்து கல்வெட்டு மற்றும் அரேபிய கல்வெட்டு, சுமார் 6 அடிக்கு கீழே 35-40அடி அகலத்தில் 2 அடி கணத்தில் பூமியில் சுமார் 10 கி.மீ தூரம் (பட்டினம் மருதூர் -கல்லாறு முகத்துவாரம் முதல் தருவைக்குளம்-சர்வே எண் 365 முகத்துவாரம்) வரை காணப்படும் மணல் மற்றும் சுண்ணாம்பு கலவையால் அமைக்கப்பட்ட சாலை(அ)கோட்டை பேன்ற சிதைவுகள், வட்ட வடிவ உறை கிணறுகள், செவ்வக வடிவத்தில் (26மீ நீளம் 25மீ அகலம்) நான்கு புறமும் படிக்கட்டுகளோடு கூடிய மிக தொன்மையான கிணறு போன்றவை அடிப்படையில் நாம் வரலாற்றினை சற்று மாற்றி யோசிக்க மறைந்த மதுரை- மூதூர்(கபாடபுரம்) குறித்த மிகவும் முக்கியமான வரலாற்று விடையங்கள் நிச்சயமாக இந்த சிப்பிக்குளம்(கீழ் வைப்பார்) முதல் வெள்ளப் பட்டி(கீழ் அரசடி) பகுதிகளில் நாம் கண்டறிந்து நம் வைப்பார் நாகரீகத்தின் உண்மை உலகுணர செய்யலாம் என்றார்.
எனவே ஏற்கனவே இந்திய தொல்லியல் துறையின் அதிகாரிகள் முன்கள ஆய்வுகள் செய்து 22.05.2024ல் நம் மாவட்ட ஆட்சியரிடம் சமர்ப்பித்த அறிக்கையில் குறிப்பிடப்பட்டுள்ளது போன்று விரைவாக இப்பகுதிகளை அறிவித்து, தொன்மங்களை பாதுகாத்து, நவீன தொழில்நுட்பங்கள் வாயிலாக காலம் தாழ்த்தாது அகழாய்வு ஆய்வுகளை தொடர வேண்டும் என தூத்துக்குடி வரலாறு மற்றும் தொல்லியல் ஆர்வலர் பெ.ராஜேஷ் செல்வரதி கோரிக்கைகளை பதிவு செய்தார்.
