முக்காணியில் ஆற்றில் குளித்துக் கொண்டிருந்த விவசாயியிடம் செல்போனை திருடிச் சென்ற 3 பேரை போலீசார் கைது செய்தனர்.
இதுகுறித்து போலீஸ் தரப்பில் கூறப்படுவதாவது : தூத்துக்குடி மாவட்டம், முக்காணியிலுள்ள முதலியார் தெருவைச் சேர்ந்தவர் ஆவுடையப்பன் மகன் கண்ணையா (28). விவசாயியான இவர், கடந்த மார்ச் 31ம் தேதி இரவு காந்திநகர் படித்துறை அருகே செல்போன் டார்ச் வெளிச்சத்தில் ஆற்றில் குளித்துக் கொண்டிருந்தாராம்.
அப்போது, மது போதையில் வந்த அதே ஊர் சந்தனமாரியம்மன் கோயில் தெரு முருகன் மகன் முத்துராஜ் (24), ஆறுமுககுமார் (24), பெரியசாமி (40) ஆகியோர் அவரது செல்போனை திருடிச் சென்றனராம். கண்ணையா விரட்டிச் சென்றபோது, அவர்கள் அவதூறாகப் பேசி மிரட்டினராம். புகாரின்பேரில், ஆத்தூர் போலீசார் வழக்குப் பதிந்து, மூவரையும் கைது செய்தனர்.
