ரயிலில் 60 வயது மற்றும் அதற்கு மேற்பட்ட முதியோர்களுக்குக் குறைந்தபட்சம் ஸ்லீப்பர் மற்றும் 3 ஏசி வகுப்புகளிலாவது கட்டணச் சலுகை வழங்க வேண்டும் என்று பிரதமருக்கு கோரிக்கை விடுக்கப்பட்டுள்ளது.
கோவிட் பெருந்தொற்றுக் காலத்தில் நிறுத்தப்பட்ட முதியோருக்கான ரயில் கட்டணச் சலுகையை மீண்டும் அமல்படுத்தக் கோரி, ‘தமிழ்நாடு மூத்த குடிமக்கள் நல இயக்கம்’ சார்பில் நாட்டின் பிரதமருக்குக் கோரிக்கை மனு அனுப்பப்பட்டுள்ளது.
1989-90 ரயில்வே பட்ஜெட்டில் அறிமுகப்படுத்தப்பட்ட இச்சலுகை, பின்னர் பல்வேறு காலகட்டங்களில் திருத்தப்பட்டு 2011-ஆம் ஆண்டு முதல் 60 வயதுக்கு மேற்பட்ட ஆண்களுக்கு 40% சலுகையும், 58 வயதுக்கு மேற்பட்ட பெண்களுக்கு 50% சலுகையமாகவும் வழங்கப்பட்டு வந்தது.
கடந்த 20/3/2020 அன்று கொரோனா பரவலைக் காரணம் காட்டி இந்தச் சலுகை ரத்து செய்யப்பட்டது. ஜப்பான், ஜெர்மனி, ஸ்பெயின், நேபாளம், பங்களாதேஷ் உள்ளிட்ட பல உலக நாடுகளில் முதியோர்களுக்குப் பொதுப் போக்குவரத்தில் 25% முதல் 100% வரை கட்டணச் சலுகைகள் வழங்கப்பட்டு வருவதை மனுவில் சுட்டிக்காட்டியுள்ளனர்.
நாடாளுமன்ற நிலைக்குழு பரிந்துரைத்தபடி, குறைந்தபட்சம் ‘ஸ்லீப்பர்’ மற்றும் ‘3 ஏசி’ வகுப்புகளிலாவது முதியோருக்கான கட்டணச் சலுகையை மீண்டும் நடைமுறைப்படுத்த வேண்டும் என்று வலியுறுத்தி ஆசிய பசிபிக் பிராந்தியம் – APRCEM முதியோர் நலப் பிரிவின் முக்கியப் பொறுப்பாளரும், அமைப்பின் நிறுவனருமான டாக்டர் சங்கர் பிரதமருக்கு கடிதம் அனுப்பியுள்ளார்.
