ஸ்ரீவைகுண்டம் ரயில் நிலையத்தில் நின்று சென்ற பாலக்காடு எக்ஸ்பிரஸ் ரயிலுக்கு வரவேற்பு அளித்த கிராம மக்கள். மழை வெள்ளத்தில் சிக்கிய 800 ரயில் பயணிகளுக்கு உணவு அளித்த மக்களுக்கு நன்றி செலுத்திய ரயில்வேத்துறை.
கடந்த டிசம்பர் மாதம் 17 மற்றும் 18 ஆகிய தேதிகளில் பெய்த கனமழையின் காரணமாக திருச்செந்தூரில் இருந்து சென்னை செல்லும் செந்தூர் எக்ஸ்பிரஸ் ரயில் ஆனது ஸ்ரீவைகுண்டம் ரயில் நிலையத்தில் இரண்டு நாட்களாக நிறுத்தி வைக்கப்பட்டிருந்தது. இந்த நிலையில் இந்த ரயிலில் நிறுத்தி வைக்கப்பட்டிருந்த ரயில் பயணிகளுக்கு ஸ்ரீவைகுண்டம் மற்றும் புதுக்குடி ஆகிய பகுதிகளை சேர்ந்த பொதுமக்கள் தங்களது வீட்டில் இருந்த உணவுப் பொருட்களைக் கொண்டு வந்து ரயில் பயணிகளுக்கு உணவு அளித்தனர்.
இந்த நிலையில் கடந்த சில வாரங்களுக்கு முன்பு தென்னக ரயில்வே பொது மேலாளர் ஸ்ரீவைகுண்டம் ரயில் நிலையத்தில் வந்து பொதுமக்களின் குறைகளை கேட்டறிந்தார். அப்போது அந்த பகுதியை சேர்ந்த பொதுமக்கள் தென்னக ரயில்வே மேலாளரிடம் தங்களது பகுதி வழியாக பாலக்காடு வரை செல்லும் பாலக்காடு எக்ஸ்பிரஸ் ரயில் ஸ்ரீவைகுண்டம் ரயில் நிலையத்தில் நிற்காமல் செல்கிறது எனவும் இந்த ரயிலை ஸ்ரீவைகுண்டம் ரயில் நிலையத்தில் நிறுத்தி செல்ல வேண்டும் எனவும் தென்னக ரயில்வே மேலாளரிடம் கோரிக்கை விடுத்தனர்.
இந்த நிலையில் ரயில் பயணிகளுக்கு உணவளித்த ஸ்ரீவைகுண்டம் மக்களுக்கு நன்றி கடன் செலுத்தும் விதமாக ஸ்ரீவைகுண்டம் ரயில் நிலையத்தில் பாலக்காடு எக்ஸ்பிரஸ் சோதனை முறையில் நின்று செல்லும் என தென்னக ரயில்வே அறிவித்துள்ளது.
இதன்படி இன்று மதியம் 1 மணி அளவில் ஸ்ரீவைகுண்டம் ரயில் நிலையத்திற்கு திருச்செந்தூரில் இருந்து பாலக்காடு நோக்கி பாலக்காடு எக்ஸ்பிரஸ் ரயில் வந்தது. அதனை வரவேற்கும் விதமாக ஸ்ரீவைகுண்டம் மற்றும் புதுக்குடி கிராம மக்கள் ரயில் எஞ்சின் ஓட்டுநர்களுக்கு பொன்னாடை அணிவித்து கௌரவித்தனர். அதைத் தொடர்ந்து ரயில் முன்பு மாலை அணிவித்து நின்று செல்லும் ரயிலுக்கு மரியாதை செலுத்தினர். அப்போது ரயில் ஓட்டுநர்கள் பொதுமக்களுக்கு நன்றியை தெரிவித்தனர். அதைத் தொடர்ந்து ரயிலில் வந்த பயணிகளுக்கு இனிப்புகள் வழங்கினர். அதன்பின்னர் அங்கிருந்து ரயில் கிளம்பியது.
இந்த நிகழ்ச்சியில் 100க்கும் மேற்பட்ட பொதுமக்கள் கலந்து கொண்டனர்.


