தூத்துக்குடியில் இருந்து இலங்கைக்கு கடத்த முயன்ற ரூ.69 லட்சம் மதிப்புள்ள பீடி இலைகளை க்யூ பிரிவு போலீசார் பறிமுதல் செய்துள்ளனர்.
தூத்துக்குடியில், கியூ பிரிவு குற்ற புலனாய்வுத்துறை காவல் ஆய்வாளர் விஜய அனிதாவுக்கு கிடைத்த ரகசிய தகவலின் அடிப்படையில் உதவி ஆய்வாளர் ராமசந்திரன் சிறப்பு உதவி ஆய்வாளர் ராமர் தலைமை காவலர் இருதயராஜ் குமார் இசக்கிமுத்து காவலர் பேச்சி ராஜா ஆகியோர் இன்று அதிகாலை 04.30 மணியளவில் ஸ்டெர்லைட் அருகே, பைபாஸ் ஜோதி நகர் விலக்கு பகுதியில் ரோந்து பணியில் ஈடுபட்டனர்.
அப்போது, இலங்கைக்கு கடத்துவதற்காக லோடு வேனில் பீடி இலைகள் மூட்டைகள் பதுக்கி வைக்கப்பட்டிருந்தது தெரியவந்தது. அதில், சுமார் 35 கிலோ வீதம் 59 மூட்டைகளில் இருந்த சுமார் 2000 கிலோ பீடி இலைகள் கைப்பற்றபட்டது. இதன் மதிப்பு 69 இலட்சம் ஆகும். மேலும் இதில் தொடர்புடையவர்களை போலீசார் தேடி வருகின்றனர். கைப்பற்றபட்ட பீடி இலைகள் மேல் நடவடிக்கைக்காக சுங்கத்துறை வசம் ஒப்படைக்கப்பட்டது.
