தூத்துக்குடியில் நடைபெற்ற அகில இந்திய அளவிலான கல்லூரி அணிகளுக்கிடையேயான மின்னொளி கூடைப்பந்து போட்டியில் பெண்கள் பிரிவில் பெங்களூர் அணியும், ஆண்கள் பிரிவில் சென்னை அணியும் கோப்பையை வென்றன.
தூத்துக்குடி மாவட்ட கூடைப்பந்து கழகம் சார்பில் 15வது அகில இந்திய பல்கலைக்கழக கல்லூரி ஆண்–பெண் பிரிவு மின்னொளி கூடைப்பந்து போட்டி கடந்த 29ஆம் தேதி தொடங்கி, நவ.2ஆம் தேதி வரை நடைபெற்றது. இந்தப் போட்டியில் தமிழகம், கேரளா, கர்நாடகா உள்ளிட்ட மாநிலங்களை சேர்ந்த பல்வேறு பல்கலைக்கழக மற்றும் கல்லூரி அணிகள் கலந்து கொண்டனர்.
பெண்கள் பிரிவில் லீக் முறையில் நடைபெற்ற இறுதிப்போட்டியில் எம் ஓ பி வைஷ்ணவ் கல்லூரி அணியும் பெங்களூர் ஜெயின் யுனிவர்சிட்டி அணியும் மோதின. விறுவிறுப்பாக நடைபெற்ற ஆட்டத்தில் பெங்களூர் ஜெயின் யுனிவர்சிட்டி அணி 69-60 என்ற புள்ளிக் கணக்கில் வெற்றி பெற்றனர்.
இதைத்தொடர்ந்து ஆண்கள் பிரிவில் சென்னை இந்துஸ்தான் கல்லூரி அணியும் பெங்களூர் ஜெயின் யுனிவர்சிட்டி அணியும் மோதின. பரபரப்பாக நடைபெற்ற இந்த ஆட்டத்தில் சென்னை இந்துஸ்தான் கல்லூரி அணி 77-67 என்ற புள்ளி வெற்றி பெற்றது. பின்னர் நடைபெற்ற பரிசளிப் விழாவில் வெற்றி பெற்ற அணிக்கு ரொக்க பரிசு மற்றும் கேடயமும் வழங்கப்பட்டது.
