பெண்ணைத் தாக்கி கொலை மிரட்டல்: கணவர் கைது

கோவில்பட்டி அருகே பெண்ணைத் தாக்கி கொலை மிரட்டல் விடுத்ததாக கணவரை போலீசார் கைது செய்தனர்.

தூத்துக்குடி மாவட்டம், கோவில்பட்டி அருகே இலுப்பையூரணி மேட்டு தெரு தாமஸ் நகரைச் சேர்ந்த சண்முகையா மகன் மாரீஸ்வரன்(43). ஓட்டுநரான இவருக்கு மது பழக்கம் இருந்து வந்ததாம். இதனால் மாரீஸ்வரனுக்கும் அவரது மனைவி பவுன் இசக்கிக்கும் இடையே அடிக்கடி தகராறு ஏற்படுமாம். இந்நிலையில் சம்பவத்தன்று பவுன் இசக்கி தனது வீட்டின் முன்பு தனது குழந்தைகளுடன் நின்று பேசிக் கொண்டிருந்தாராம்.

அப்போது அங்கு வந்த மாரீஸ்வரன், பவுன் இசக்கியை அவதூறாகப் பேசி அரிவாளால் தாக்கினாராம். அவரது உறவினர்கள் மாரீஸ்வரனை கண்டித்ததும் அவர் கொலை மிரட்டல் விடுத்தபடி சென்று விட்டாராம். இதில், காயமடைந்த பவுன் இசக்கி கோவில்பட்டி அரசு மருத்துவமனையில் சிகிச்சை பெற்றார். இதுகுறித்து கோவில்பட்டி கிழக்கு காவல் நிலைய போலீசார் வழக்குப் பதிந்து, மாரீஸ்வரனை கைது செய்தனர்.