தூத்துக்குடியில் பணம் வைத்து சூதாடிய 8 பேரை போலீசார் கைது செய்தனர். அவர்களிடம் இருந்து ரூ.70 ஆயிரம் பணம், 5 பைக்குகள் பறிமுதல் செய்யப்பட்டது.
தூத்துக்குடி தாளமுத்துநகர் போலீஸ் சப்-இன்ஸ்பெக்டர் முத்துராஜா தலைமையிலான போலீசார் ரோந்து பணியில் ஈடுபட்டு இருந்தனர். அப்போது ஓம்சக்திநகர் பகுதியில் சிலர் பணம் வைத்து சூதாடிக்கொண்டு இருந்தனர்.
உடனடியாக போலீசார் விரைந்து சென்று சூதாடிக் கொண்டு இருந்த தாளமுத்துநகரை சேர்ந்த ஆதிலிங்கம் (வயது 44), வீரா (30), வசந்தலிங்கம் (22), ரமேஷ் (46), சஞ்சய்குமார் (31), தவமணி (62), ஆதிஆனந்தலிங்கம் (21), முத்துகுமார் (31) ஆகிய 8 பேரையும் கைது செய்தனர். அவர்களிடம் இருந்து ரூ.70 ஆயிரத்து 400 ரொக்கப்பணம், 5 மோட்டார் சைக்கிள்கள் பறிமுதல் செய்யப்பட்டன.
