கயத்தாறு அருகே மனைவியின் வளைகாப்பு நடந்த மறுநாள் வாலிபர் தூக்கு போட்டு தற்கொலை செய்துகொண்டார்.
தூத்துக்குடி மாவட்டம், கயத்தாறையடுத்த தெற்கு கோனார்கோட்டை வடக்குத் தெருவைச் சேர்ந்த சங்கிலிபாண்டியன் மகன் சங்கிலிகுமார் (35). தொழிலாளியான இவருக்கும், கே.கரிசல்குளத்தைச் சேர்ந்த கிருஷ்ணவேணிக்கும் ஓராண்டுக்கு முன்பு திருமணமானது.
கடந்த 3 மாதங்களாக மதுப் பழக்கத்துக்கு உள்ளான சங்கிலிகுமார், சரிவர வேலைக்குச் செல்லாததுடன், மாடு வாங்குவதற்காக வாங்கிய கடனையும் திருப்பிச் செலுத்த முடியாமல் இருந்தாராம். கடந்த 3ஆம் தேதி கிருஷ்ணவேணிக்கு வளைகாப்பு நடத்தி பெற்றோர் அழைத்துச் சென்றுவிட்டனர்.
இந்நிலையில், நேற்று முன்தினம் பிற்பகல் சங்கிலிகுமார் வீட்டில் தூக்கிட்டுத் தற்கொலை செய்துகொண்டாராம். தகவலின்பேரில், கயத்தாறு போலீசார் சென்று சடலத்தைக் கைப்பற்றி கூறாய்வுக்காக கோவில்பட்டி அரசு மருத்துவமனைக்கு அனுப்பிவைத்தனர்.மேலும், வழக்குப் பதிந்து விசாரணை நடத்தி வருகின்றனர்.
