தூத்துக்குடி மாவட்டம் முழுவதும் இடி, மின்னலுடன் முழுவதும் பரவலாக மழை பெய்தது. சாலைகள், தெருக்களில் தண்ணீர் பெருக்கெடுத்து ஓடியது.
தூத்துக்குடி மாவட்டத்தில் கடந்த சில வாரங்களாக கோடை வெயிலின் தாக்கம் அதிகரித்து வருகிறது. பகல் நேரங்களில் வெளியில் மக்கள் நடமாட முடியாத அளவுக்கு வெயில் வாட்டி வதைத்தது. அனல் காற்றும் வீசியதால் பொதுமக்கள் கடும் அவதிப்பட்டனர்.
இந்த நிலையில் குமரிக்கடல் மற்றும் அதனை ஒட்டிய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. அதேபோன்று லட்சத்தீவு மற்றும் அதனை ஒட்டிய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. இதனால் தூத்துக்குடி, நெல்லை, தென்காசி உள்பட தமிழகத்தின் பல பகுதிகளில் மழை பெய்ய வாய்ப்பு இருக்கிறது என்று வானிலை ஆய்வு மையம் அறிவித்து உள்ளது.
இந்த நிலையில், தூத்துக்குடியில் நேற்று மாலை முதல் இடி, மின்னலுடன் பலத்த மழை பெய்தது. சுமார் 1 மணி நேரம் மழை பெய்தது. மேலும் இரவு முழுவதும் நீடித்த சாரல் மழையால், சாலைகள், தெருக்களில் தண்ணீர் பெருக்கெடுத்து ஓடியது. தாழ்வான பகுதிகளில் மழைநீர் தேங்கியது. இந்த மழையால் கோடை வெப்பம் சற்று தணிந்து பொதுமக்கள் மகிழ்ச்சி அடைந்துள்ளனர். .
