தூத்துக்குடியில் வீட்டின் முன்பு மூலிகைச் செடிகள் இடையே வளர்ந்த 8 அடி உயர கஞ்சா செடியை போலீசார் வேருடன் பிடுங்கி எடுத்து விசாரணை நடத்தி வருகின்றனர்.
தூத்துக்குடி மாநகரின் மையப் பகுதியில் அமைந்துள்ள ஆவுடையார்புரம் பகுதியில் அன்புராஜ் என்பவர் தனது வீட்டின் முன்புறம் பல்வேறு மூலிகை செடிகள் வளர்ந்து வருகின்றார். இதன் இடையே ஆள் உயர கஞ்சா செடி ஒன்று வளர்ந்து உள்ளது. இந்த செடி கஞ்சா செடி என்று தெரியாமலேயே மலை வேம்பு என்று நினைத்து தண்ணீர் ஊற்றி வளர்த்து வந்தாராம்.
இந்நிலையில் அந்தப் பகுதியில் இன்று கட்டிட வேலைக்கு வந்து சிலர் வளர்ந்து இருப்பது கஞ்சா செடி என காவல்துறைக்கு தகவல் தெரிவித்தனர். இதைத்தொடர்ந்து மத்திய பாகம் காவல்துறையினர் அந்த செடியை சோதனை செய்ததில் அது கஞ்சா செடி என தெரியவந்தது. மேலும் இந்த கஞ்சா செடி சுமார் 8 அடி உயரம் வரை வளர்ந்து இருந்தது.
இதைத் தொடர்ந்து கஞ்சா செடியை காவல்துறையினர் வேரோடு பிடுங்கி மத்திய பாகம் காவல் நிலையத்திற்கு எடுத்துச் சென்றனர். பின்னர் காவல் நிலையத்தில் வைத்து கஞ்சா செடி எத்தனை கிலோ என்பது எடை போட்டு தெரியவந்த பின்னர் இது தொடர்பாக வழக்கு பதிவு செய்யப்பட்டு விசாரணை நடத்தப்படும் என தெரிவித்தனர். மூலிகைச் செடியுடன் 8 அடி உயர கஞ்சா செடி வளர்ந்த சம்பவம் தூத்துக்குடியில் பரபரப்பை ஏற்படுத்தியுள்ளது.
