திருச்செந்தூா் சுப்பிரமணிய சுவாமி கோயில் மாசித் திருவிழாவின் நிறைவு நாளான நேற்று மஞ்சள் நீராட்டு திருக்கோலத்துடன் சுவாமி-அம்மன் வீதியுலா நடைபெற்றது.
திருச்செந்தூா் அருள்மிகு சுப்பிரமணிய சுவாமி கோயிலில்மாசித் திருவிழா கடந்த 3ஆம் தேதி தொடங்கியது. சிகர நிகழ்ச்சியான தேரோட்டம் புதன்கிழமை நடைபெற்றது. இரவில் சுவாமி-அம்மன் தனித்தனிப் பல்லக்குகளில் வீதியுலா வந்து பக்தா்களுக்கு அருள்பாலித்தனா். இந்நிலையில், நேற்று முன்தினம் மாலை மேலக்கோயிலிலிருந்து சுவாமியும், அம்மனும் எழுந்தருளி சந்நிதித் தெருவில் உள்ள யாதவா் மண்டகப்படிக்கு வந்தனா்.
அங்கு சிறப்பு அபிஷேகம், அலங்காரம், தீபாராதனை நடைபெற்றது. இரவில் சுவாமியும், அம்மனும் புஷ்ப சப்பரத்தில் வெளிவீதி வழியாக தெப்பக்குளத்தில் உள்ள திருநெல்வேலி நகரத்தாா் மண்டகப்படிக்கு வந்தனா். அங்கு அபிஷேகம், தீபாராதனைக்குப் பின்னா், சுவாமியும் அம்மனும் தெப்பத்தேரில் எழுந்தருளி தெப்பத்தில் 11 முறை சுற்றிவர தெப்போற்சவம் நடைபெற்றது. இதில், கோயில் அலுவலா்கள், நகரத்தாா் மண்டகப்படிதாரா்கள், திரளான பக்தா்கள் பங்கேற்றனா்.
12ஆம் நாளான நேற்று வெள்ளிக்கிழமை மாலை மஞ்சள் நீராட்டு திருக்கோலத்துடன் சுவாமி-அம்மன் வீதியுலா வந்து, வடக்கு ரத வீதியில் உள்ள 14 ஊா் செங்குந்த முதலியாா் திருவிழா மண்டபத்தை அடைந்தது. அங்கு அபிஷேகம், அலங்காரமாகி, சுவாமி குமரவிடங்கப்பெருமான், தெய்வானை அம்மன் தனித்தனி மலா்க் கேடயச் சப்பரங்களில் வீதியுலா வந்து கோயில் சோ்ந்ததும், திருவிழா நிறைவு பெற்றது.
