தூத்துக்குடியில் 7அம்ச கோரிக்கைகளை வலியுறுத்தி அங்கன்வாடி ஊழியர்கள் மற்றும் உதவியாளர்கள் தர்ணா போராட்டம் நடத்தினர்.
1993 ம் ஆண்டு பணியில் சேர்ந்தவர்களுக்கு பதவி உயர்வு வழங்க வேண்டும், ஒரு மாத கோடை விடுமுறை முழுமையாக வழங்க வேண்டும். அங்கன்வாடி ஊழியர் மற்றும் உதவியாளர்களை அரசு ஊழியர் ஆக்கி காலமுறை ஊதியம் வழங்க வேண்டும். பணி ஓய்வு பெறும்போது அவர்களுக்கு பணிக் கொடையாக ரூ.10 லட்சம் வழங்க வேண்டும் உள்ளிட்ட 7 அம்ச கோரிக்கைகளை நிறைவேற்ற கோரி மாவட்ட ஆட்சியர் அலுவலகம் முன்பு தர்ணா போராட்டம் நடந்தது.
பின்னர் கோரிக்கைகளை வலியுறுத்தி ஆட்சியரிடம் மனு அளித்தனர். இதில், மாவட்டச் செயலாளர் சந்திரா தலைமை வகித்தார். மாவட்ட தலைவர் ஜெயராணி, மாவட்ட பொருளாளர் ஜெயலட்சுமி, ஓய்வூதிய சங்க மாவட்ட செயலாளர் ராமமூர்த்தி, சிஐடியூ மாவட்டத் தலைவர் பேச்சிமுத்து உட்பட அங்கன்வாடி ஊழியர்கள் மற்றும் உதவியாளர்கள் சுமார் 400 பேர் கலந்து கொண்டனர்.
