தூத்துக்குடியில் எம்ஜிஆர் பூங்கா அருகே கஞ்சா விற்பனையில் ஈடுபட்ட 2பேரை போலீசார் கைது செய்தனர்.
தூத்துக்குடி தென்பாகம் காவல் நிலைய சப் இன்ஸ்பெக்டர் மாரிமுத்து மற்றும் போலீசார் பாளை., ரோடு எம்ஜிஆர் பூங்கா அருகே ரோந்து சென்றபோது கையில் மஞ்சப்பை உடன் நின்று கொண்டிருந்த 2பேரை பிடித்து சந்தேகத்தின் பேரில் விசாரணை செய்தனர். அவர்கள் வைத்திருந்த பையில் கஞ்சா பொட்டலங்கள் இருப்பது தெரியவந்தது.
விசாரணையில், அவர்கள் தூத்துக்குடி சத்யா நகரை சேர்ந்த வடிவராஜ் மகன் சத்யராஜ் (25), போல்டன் புரத்தைச் சேர்ந்த ஜேசு பிரகாஷ் மகன் நாதன் என்ற செஞ்சிநாதன் (19) என்பதும் சட்ட விரோதமாக கஞ்சா விற்றதும் தெரிய வந்தது. இதையடுத்து போலீசார் அவர்கள் 2பேரையும் கைது செய்து, அவர்களிடம் இருந்த 500 கிராம் கஞ்சாவை பறிமுதல் செய்தனர்.
