தூத்துக்குடி-திருச்செந்தூர் சாலையை சீரமைக்கக் கோரி உயர்நீதிமன்றத்தில் வழக்கு

தூத்துக்குடி-திருச்செந்தூர் சாலையை சீரமைக்கக்கோரி உயர்நீதிமன்ற மதுரை கிளையில் வழக்கு தொடரப்பட்டுள்ளது.

தூத்துக்குடி மாவட்டத்தை சேர்ந்த பொன் காந்திமதிநாதன், என்பவர் உயர்நீதிமன்ற மதுரை கிளையில் தாக்கல் செய்த மனுவில் கூறியிருந்ததாவது: தூத்துக்குடி முதல் திருச்செந்தூர் வரை 40 கிலோ மீட்டர் சாலையானது, தேசிய நெடுஞ்சாலைத்துறையின் கட்டுப்பாட்டில் உள்ளது. இந்த சாலையில் தூத்துக்குடி துறைமுகம், உப்பளங்கள் உள்பட பல தொழிற்சாலைகள் இயங்கி வருகின்றன.

தேசிய நெடுஞ்சாலைத்துறையின் கட்டுப்பாட்டில் சென்ற பின்னர், இந்த சாலையில் எந்த பராமரிப்பும் செய்யப்படவில்லை. முருகப்பெருமானின் 2-ம் படை வீடான திருச்செந்தூர் கோவில் இந்த பகுதியிலேயே உள்ளது. நாள்தோறும் ஏராளமான வெளிநாடு மற்றும் வெளி மாநிலபக்தர்கள் இந்த சாலையை பயன்படுத்தி வருகின்றனர். பல இடங்களில் குண்டும், குழியுமாக மிகவும் சேதம் அடைந்து காணப்படுவதால், அதிக விபத்துகள் ஏற்படுகின்றன.

இந்த சாலையை முறையாக சீரமைக்கக்கோரி மனு அளித்தும் எந்த நடவடிக்கையும் இல்லை. எனவே தூத்துக்குடி முதல் திருச்செந்தூர் வரையிலான 40 கி.மீட்டர் தூர இருவழிச்சாலையை சீரமைக்க உத்தரவிட வேண்டும். இவ்வாறு மனுவில் கூறியிருந்தார்.

இந்த வழக்கு நீதிபதிகள் நிஷா பானு, ஸ்ரீமதி ஆகியோர் முன்பு விசாரணைக்கு வந்தது. அப்போது நீதிபதிகள், இந்த வழக்கு சம்பந்தப்பட்ட அதிகாரியிடம் உரிய விளக்கம் பெற்று தெரிவிக்க அரசு வக்கீலுக்கு உத்தரவிட்டு, வழக்கை ஒரு வாரத்திற்கு ஒத்திவைத்தனர்.